A takah kan ṭha - Lewandowski

Bayern Munich striker Robert Lewandowski chuan pre season hmang ṭha lo mah se inelna takah erawh team ṭha zawk an nih thu a sawi chhuak.

Carlo Ancelotti naute hian pre season an hmang chhe hle, match ruk an khelh zingah ṭum khat chiah hnehna an chang. Mahse, season khuh hawn nan Borussia Dortmund hnehin DFL-Supercup an chawi a, Bundesliga match hmasa berah Bayer Leverkusen 3-1 in an hneh bawk.

Poland international Lewan­dowski chuan, "Season thar inbuat­saih nan khan friendly match kan khel hnem lutuk a, training-na hun pawh kan nei hman meuh lo, result ṭha kan nei thei lo pawh kha thil mak a ni lo," tiin a sawi.

Kum 29 mi Lewandowski chuan sawi chhunzawmin, "Club tin kan inel vek a, inelna hautak kan hmachhawn chiah erawh chuan Bayern hi team ṭha ber kan nih zia kan lantir thei leh ta zel mai, match hmasa berah goal ka khung nghal a, goal dang tam zawkin a zui ngei ka beisei," tiin a sawi.

Lewandowski hian season hmasa khan Bundesliga-ah goal 30 a khung a, Dortmund striker Pierre-Emerick Aubameyang aiin goal khatin a khung tlem zawk.