Lin Dan-a'n hnehna a chang

Badminton World Championship khelh mekah Chinese star Lin Dan chuan Thawhṭanni khan a match hmasa ber a khel a, harsatna nei loin Kieran Merrilees chu 21-15, 21-10 in a sawp.

World champion vawi nga ni tawh Lin Dan hi tun hnaiah a result a ṭhat tawk loh avangin a ranking pawh a hniam a, tun ṭumah hian seeded pasarihna niin Denmark tlangval Emil Holst nen an inhmachhawn leh ang.

Kumin March thla khan Holst hian German Open-ah Lin Dan hi a hneh tawh a, tun ṭumah pawh hian inrintawkna a nei ang. Olympic gold medal pawh dawng tawh Lin Dan hi a chak chho zel a nih pawhin a hmabak a awlsam dawn lo, seeded pakhatna Son Wan Ho leh Kidambi Srikanth te a paltlang a ngai dawn a ni.

Kum 33 mi Lin Dan chuan, "Eng inelnaah pawh match hmasa ber hi chu a awlsam ngai lo. Inbuatsaihna ka nei ṭhain ka phur hle a, inelna tawp thlenga dingchang nih ka tum ang," tiin a sawi.