Basti ngaisangtu Kimmich

Bayern Munich defender Joshua Kimmich chuan Bastian Schweinsteiger a ngaihsan thu a sawi a, a naupan lai chuan Basti-a inkhel enin a tih dan a zir ṭhin thu a sawi bawk.

Kum 25 mi Kimmich chuan, “Ka naupan lai chuan Bastian Schweinsteiger ang nih ka tum ṭhin hle. Inkhelh a thiam a, a thiamna piah lamah khelmual chhunga a rilru put hmang kha a ropui ka ti ṭhin.

“World Cup 2014 final an khelh ṭum khan Basti huaisen zia ka hmu, khatiang taka team tana inpekna thuk kha player zawng zawngin an neih theih loh a ni. A bula player dang awmte tan thlamuanna tham a ni a, a lak aṭangin zir tur a tam hle,” a ti.

Schweinsteiger kha German ram leh Beyern Munich tan player pawimawh leh hlu bik zinga mi a ni a, tunah chuan Kimmich-a’n a mi ngaihsan sulhnu hi a zui mek - an ram leh club khelhna a inang.

Defensive midfielder atan pawha an hman ṭhin Kimmich chuan sawi zawmin, “Schweinsteiger ang bawkin kei pawhin khelmual chhungah team tan theihtawp ka hlan ṭhin, hun harsa tawh laia midang fuih phurtu a nihna pawh entawn zel ka tum,” a ti.

German international hian football player ni loah chuan tennis legend Roger Federer a ngaihsan thu a sawi, Swiss star anga rei tak inkhelh theih a duh. A mizia leh taksa enkawl dan chu infiammite tana entawn tlak a nih thu a sawi bawk.