Zaninah UEFA Player of the Year a hriat dawn ; Ronaldo nge Messi nge Buffon?
UEFA Men's Player of the Year chu zanin hian Grimaldi Forum, Monaco-ah puan a ni dawn. He hunah hian Champions League group stage draw neih a ni nghal dawn a, ceremony hi dar 10:30 aṭangin ṭan a ni ang.
Europe khawmualpuia football thuneitu sang ber UEFA-in a thlan tur Player of the Year dawng thei tura chhawpchhuah mi pathumte chu Gianluigi Buffon, Cristiano Ronaldo leh Lionel Messi te an ni.
Superhero Buffon
Juventus ṭantuten "Superman pawh hi a chang chuan mihring pangngai Clark Kent a ni ve mai a, Gigi erawh engtiklai pawhin kan tan superhero an ni" tiin an goal vengtu Gianluigi Buffon hi an fak.
Kum 39 mi Buffon hian season liam ta khan Juventus chu league leh cup-ah a champion pui a, UEFA Champions League final a thlenpui bawk.
UCL-a final an thlen theih nan Buffon hian group stage-ah Arsenal zawm ta Alexandre Lacazette penalty pet a dang a, Barcelona nen an inhmachhawn ṭumin Andrés Iniesta goal khung tur chu mak takin a dang a, semifinal-a Monaco nen an inkhelh ṭumin kum 21 mi Kylian Mbappe a tibeidawng bawk.
Juventus-in Champions League nomawi chawi se chuan Italian keeper hi lawmman dawng tura rinkai a ni a, amaherawhchu goalkeeper a ni bawk nen Europe-a an champion tak lohah chuan Ronaldo leh Messi a elphak a rinawm ta lo.
Ronaldo leh Messi
Mimal chawimawina sang a nih tawh chuan Ronaldo leh Messi te hming lam hmaih a thiang lo a, UEFA Player of the Year chawimawina vawi ruk sem tawhah pawh vawi hnih ve ve an dawng tawh.
Portugal captain Ronaldo hian UEFA Champions League, Spanish Liga leh FIFA Club World Cup nomawi a chawi a, Club World Cup-ah hian final-a hattrick siam hmasa ber a ni. Champions League-ah match 13 khelin goal 12 a khung a, kum nga chhung a zawnin he inelnaah hian top scorer a ni.
Argentina captain Messi hi La Liga-ah match 34 khelin goal 37 a khung a, top scorer a ni. Catalan club-in Copa del Rey an champion-na kawngah player pawimawh bik a ni a, Champions League inlehthalna ropui ber zinga sawi reng tawh tur Paris Saint-Germain 6-1 zeta an sawp ṭumin a thawh hlawk viau bawk.
UCL draw
Champions League draw-a tel tur team 32 zingah team 27 chu a hriat tawh a, chungte chu Real Madrid, Bayern Munich, Juventus, Benfica, Chelsea, Shakhtar Donetsk, Monaco, Spartak Moscow, Barcelona, Atlético Madrid, Paris Saint-Germain, Borussia Dortmund, Sevilla, Manchester City, Porto, Manchester United, Napoli, Tottenham Hotspur, Basel, Olympiakos, Anderlecht, Roma, Besiktas, Celtic, Feyenoord, Maribor leh RB Leipzig te an ni. Nizan khan playoff khelh zawh a ni a, match nga inkhel result kan hre hman lo.
Lawmman sem turte
Men's Player of the Year
Gianluigi Buffon, Lionel Messi leh Cristiano Ronaldo
Women's Player of the Year
Pernille Harder (Denmark, Linkoping & Wolfsburg), Dzsenifer
Marozsán (Germany, Lyon) leh Lieke Martens (Netherlands,
Rosengard & Barcelona)
Goalkeeper of the 2016/17 UCL season
Gianluigi Buffon (Juventus), Manuel Neuer (Bayern München),
Jan Oblak (Atlético Madrid).
Defender of the 2016/17 UCL season
Leonardo Bonucci (Juventus, tunah AC Milan), Marcelo
(Real Madrid), Sergio Ramos (Real Madrid)
Midfielder of the 2016/17 UCL season
Casemiro (Real Madrid), Toni Kroos (Real Madrid),
Luka Modric (Real Madrid)
Forward of the 2016/17 UCL season
Casemiro (Real Madrid), Toni Kroos (Real Madrid),
Luka Modric (Real Madrid)