Lee Chong Wei a tla nghal

Badminton World Cham­pion­­ship khelh mekah Malaysian badminton legend Lee Chong Wei chu Thawhlehni zan khan Brice Leverdez lakah rin loh tak maiin a tlawm.

Glasgow-a inkhelah kum 31 mi Leverdez hian darkar khat leh minute 15 zet an inkhelh hnuah Olympic silver medal pahnih dawng tawh Lee hi 21-19, 22-24, 21-17 in a hneh a, badminton a khelh hun chhung a hnehna a chan ropui ber zingah a chhiar tel theih ang.

France tlangval Leverdez chuan, "Ka hlim takzet, hlauthawng miah loh ka duhdan takin ka khel chhuak ngam a, buaina ka tawk tih ka hre reng chungin ka beidawng duh lo a, a tawpah ka hlawhtlin phah ta a ni," tiin a sawi.

Leverdez hian game hnihnaah 20-21 leh 21-22 a nih laiin match point ṭum hnih a nei a, mahse a chhawr ṭangkai theih loh avangin game thumna khelh a ni. Game hnuhnung berah hian Lee-a'n 15-10 a hma a hruai fal avangin chak tura rin a ni hman. Amaherawhchu, Leverdez hi a beidawng duh lo a, huaisen taka bei letin point hnih bak a hloh tawh lo a, hnehna a chang zui ta a ni.

Kum 34 mi Lee chuan, "A pawi ka ti takzet, ka ruahman angin ka khel chhuak thei lo. Ka theihtawp ka chhuah a, ka vanduai chu thuhran ni se point ṭhenkhatah kha chuan a vannei ve bawk a ni," tiin a sawi. Lee hian kumin kumtir lam khan a vawi li nan All-England Open nomawi a chawi.

Mipa inkhel dangah Olympic champion lai Chen Long chuan harsatna nei loin Georges tlangval Julien Paul chu 21-7, 21-9 in a hneh, hnehna chang tur hian Chinese star tan hna hautak a awm lo. Seeded pakhatna Akane Yamaguchi pawhin minute 28 chhung lekin Line Hojmark Kjaersfeldt chu 21-13, 21-11 in a hneh ve bawk.