Aizawl FC-in Saighani lalut

I League champion Aizawl FC chuan tlar­hnung thuam chak nan Masih Saighani an lalut. Afghan defender kum 31 mi hian September thla tawpah Mizo club training a zawm theih beisei a ni.

AFC hian MPL-a chhawr turin captain Alfred Kemah Jaryan an chelh a, tlarhnung thuam chak nan Nigerian defender Kareem Omolaja Nurain leh goalkeeper Avilash Paul te an lalut a. I League-a hman turin Masih Saighani hma hian Japanese striker Yugo Kobayashi leh Ivorian forward Leonce Dodoz te chu contract an ziahpui tawh bawk.

Kum 31 mi Saighani hi central defender leh defensive midfield-a chhawr theih a ni a, German club VfB Mar­burg-ah inzir chhuakin German division hniam lamah club hrang hrangah a khel kual a, Aizawl FC a zawm hma hian Turk Gucu Friedberg tan a khel a, Afghanistan tan vawi sarih inlan tawhin goal hnih a khung.

AFC technical director Hmingthansanga chuan, "International match-a tawnhriat nei player kan la thei hi ka lawm khawp mai, Saighani hi Europe a club football khel a nih vangin nasa takin kan team a tihchak ka beisei a ni," tiin Vanglaini a hrilh.