Aizawlah Asian Football Confederation Futsal Course

Mizoram Football Association chuan, Asian Football Confederation Futsal Course a thleng dawn. He thu hi nimina MFA Futsal Committee ṭhutkhawmah sawi chhuah a ni. MFA Futsal Committee thurel zingah hengte hi a tel:

Aizawlah AFC Futsal Course

Asian Football Confederation chuan India ramah Futsal tihhma­sawn tumin hma a la mek a, August 8-11 chhung khan New Delhi-ah AFC lama Futsal hotute'n AIFF-te chu Futsal chungchanga inrawnkhawmna an neihpui a, Futsal match official tan training an nei bawk. He mi bawhzuina atan India ramah Futsal tihhmasawn zelna turin Asian Football Confederation Futsal Level 1 Course buatsaih an tum a, he Course kalpuina hmun atan hian Aizawl an thlang.

MFA Futsal Committee chuan FIFA leh AFC dan anga Mizoramah ngei Futsal zirna, India rama a hmasa ber neih tur chu lawmawm a ti a, Mizo ṭhalaiten Futsal dan dik tak an hmelhriat a, an chhawr ṭangkai ngei a beisei.

AFC Futsal Level 1 Course hi November/December-ah buatsaih tur a ni a, AIFF chuan MFA hnenah lehkha a thawn tawh a, MFA lam pawhin an thlen theih tur thu an thawn lêt tawh a, AFC lamah lehkha kal mekin a hun tur an rawn ruat dawn a ni.

MFA Futsal Training

Tun hnaiah AFC MA Futsal Refree Development Course chu New Delhi-ah neih zawh a ni a, Mizo referee Lalthangliana leh Lalhriatliana-te he course-ah hian an tel. Anni pahnih hian MFA Futsal Committee hmaah report an pe tawh a, anni kaihhruaina hian September 2, 2017 hian Rajiv Gandhi Stadium-ah MFA Futsal training buatsaih a ni ang.

He hunah hian MFA Futsal League khelh tum team tin aṭangin referee tur pakhat leh team official pakhat theuh tel tura hriattir an ni a, MFA Futsal competition-a match official lo ni tawhte pawh tel theih a ni ang.

Mizoramin Futsal dan a hmel­hriat fuh tawk loh, FIFA dan hmanlai nena inang lo thenkhat awmte pawh inhrilh hriat a ni dawn a, AFC instructor-te'n an zirtir angin FIFA Futsal dan dik tak zir a ni ang.

MFA Futsal Registration

August, 2017 chhung hian MFA Futsal hnuaia inziak lut duhte tan club affiliation leh player registration hun hawn mek zel a ni a, club eng emaw zat an inziak lut tawh a, August 31 thleng inziah luh theih a ni ang.

Inziak lut tur hian kum 2018-a MFA Futsal League khelh tumte tan tehna hran hman a ni a, Futsal League khelh tum ni lem lo club-te tan pawh inziah luh dan hawn a ni.

Hre chiang duh tan MFA Marketing Officer Mark Lalduhsaka (phone 9999176275) biak pawh theih a ni e.