De Bruyne hma hun a chiang lo

Manchester City thiampuipa Kevin De Bruyne chuan season hnih chhung Champions League khel loa hremna tawrh chu rei a ti a, season khat chauh an hrem a nih erawh chuan a tuar theih tur thu a sawi.

Man City hi an sum hman dan a dik loh avangin UEFA chuan season hnih atan a hrem, hrem an nihna hi infiamna lama thubuai ngaihtuahtu sang ber Court of Arbitration for Sport (CAS) hnenah an thlen, an thubuai hi coronavirus nen an in nanchin tak avangin ngaihtuah theih a la ni rih lo.

Belgian chanchinbu Het Laatste-in an kawmnaah De Bruyne chuan ti hian a sawi, “Ka nghak mek, club chuan an khinlet tur thu leh, an dikna chu 100% deuh tawh a nih thu min hrilh. Eng nge lo thleng dawn tih ka nghak mek.

“Thubuai ching fel se, thil engkim ka ngaihtuah nawn ang. Kum hnih hrem kan nih chuan a rei lutuk dawn, season khat chauh a nih chuan a tuar pawh a ziaawm deuh mahna,” tiin a sawi.

Barcelona leh Real Madrid chungchang zawhna chhangin KBD chuan, “Khawvela club ṭha berte zinga miah ka khel mek. England-ah awmin khawvela league hautak ka tih tak Premier League ka khel bawk, he hmuna awm hi chona ṭha tak a ni,” tiin Spanish club lian pahnih a ngaihven loh thu a sawi bawk.

City manager Pep Guardiola pawh chhuak tur anga sawi awm mah se tun dinhmunah chuan chhuah tumna a nei lo. Spanish manager hian club lamin an hrilh ang ngeiin thiam an chan a ring, thutlukna erawh an nghah rih a ngai thung.

Belgium international De Bruyne chuan, “Ka rin dan chuan eng pawh thleng se Pep a chhuak lo ang,” a ti. Barcelona manager hlui Guardiola thutlukna chuan a hma hun a nghawng ve kher loh tur thu a sawi bawk.

Premier League chungchang sawi zawmin kum 28 mi De Bruyne chuan, “Kar hnih hnu velah chuan training kan neih leh theih tawh mai ka ring. Thuneitu lam pawhin inkhel a awm leh an duh ka ring a, season hman lai hi khelh zawh ngei ka duh.

“Player-te hian a mimal ngawr ngawr chuan coronavirus hi an hlau loin ka hria, chutih rualin chhungkua a awm nih chuan chhungte kha hri kan kaisak ang tih an hlau tlangin ka hria,” a ti.

Guardiola enkawl Man City hi Premier League champion lai an ni a, league an khelh chhunzawm a nih chuan Liverpool lakah an nomawi kawl lai an chan ngei ang. Champions League-ah erawh Real Madrid chu khualmualah 2-1 in an luhchhuah a, quarterfinal lut turin an dinhmun a ṭha.