Barca-in Neymar an khing

Barcelona chuan pound mak­taduai 200-a Paris St-Germain a pan hnuah an player hlui Neymar chu a contract zah loah an puh a, nikum August-a contract thar a ziah avanga a rinawm mana bonus an pek pound maktaduai 7.5 chu pe let turin an ti - Barca hian Neymar hnena 'rinawm man' an pek tura an lo tih tawh pound maktaduai 23 dang chu an pek loh thu an tarlang bawk.

Catalan club chuan thu­chhuah siamin, "Club chuan Neymar hi pawisa kan pek tawh sa kha min pe let ngei turin kan phut a, kan hun tiam chhunga min pek let loh avangin 10% a pung awma min pek kan phut bawk. Player hian heng a sum chawi turte hi amah maia a tifel thei lo a nih chuan Paris St-Germain chu an player buaipui tur hian kan phut bawk a ni," an ti.

French club chuan Barcelona thuchhuah hi an chhanglet ve nghal a, dan zawm ngai ang zawng zawng an zawm vek chunga Catalan club chet dan chu mak an tih thu an sawi. Barca hian an player hlui an khinna hi August 11 khan Barcelona khawpuia Labour Tribunal hnenah an thehlut.

Neymar hian kartawp Ligue 1-a Toulouse an sawp hnu lawkah Barca hruaitute sawiselin, "Kum li hun duhawm tak ka hmang a, hlim takin ka chhuahsan a ni. Mahse, board nen erawh kan inmil lo. Ka ngaihdanah chuan saw hmunah sawn awm tur an ni lo a, Barca hian anni aia mi ṭha zawk a phu a ni," a ti.

Barcelona hian an president hlui Juan La­porta chu a hunlaia club sum hloh chungchangah a chhuah hnu lawkah an lo khing tawh bawk a, thiam erawh an chang lo.