Champions League khel tur Sevilla, Napoli, Olympiakos, Celtic leh Maribor
Champions League khel turin Sevilla, Napoli, Olympiakos, Celtic leh Maribor te an inpetling. Kazakhstan-ah Scottish club Celtic-in Astana 4-3 in an hneh lo a, amaherawhchu first leg-a 5-0 zeta an chak avangin aggregate-ah erawh 8-4 in an chak.
Playoff-a chak zo ta lo; Istanbul Basaksehir F.K, Nice, Rijeka, Astana leh Hapoel Be'er Sheva ten Europa League an khel thung ang.
A vawi 3 nan Sevilla
Sevilla-in Turkey-ah 2-1 in hnehna chang mah se an mualah Eljero Elia-a'n Istanbul Basaksehir F.K. tan minute 17-na leka goal a khung avangin Spanish club an buai hman. Amaehrawhchu first leg-a Sevilla tana goal khungtu Sergio Escudero leh Ben Yedder te bawkin an mualah an khung a, Turkish club tan Edin Visca-a'n goal a khung leh avangin hun tawp thlengin inkhel boruak a sang.
Istanbul Basaksehir F.K captain Emre Belozoglu-a'n goal ban a pet per a, Champions League khel turin Sevilla an tling hram. Spanish club hian a vawi thum nan a zawnin Champions League group stage an thleng.
Thlen san duh Rodgers
Celtic-in Kazakhstan-ah goal thum khung mah se Astana-in goal li an khung avangin playoff an khar danah an lawm lo ang. Amaherawhchu Brendan Rodgers-a hote hi Champions League khel turin an tling ta tho.
Liverpool manager hlui Rodgers chuan, "Champions League khel tura tlin hi hlawhtlinna a ni a, lawmna tham a tling. Astana kan hmachhawn aṭangin inzirna tur tam tak kan nei a, kha aia ṭha zawka team kan din a ṭul a ni. Krismas zawh hnuah pawh Champions League kan la khel tur a ni," tiin group stage kal pel ngei a tum thu a sawi.
Napoli an ṭha
Napoli-in an mualah Ligue 1 club Nice 2-0 in an hneh a, France-ah pawh hetiang zat bawk hian Serie A club an chak. Italian club tan Jose Callejon leh Lorenzo Insigne ten goal an khung.
Goal khungtu Insigne chuan, "Club lian tak takin min enthla tih ka hriat hian ka lawm a, amaherawhchu Napoli kawr nena chet ṭhat hi ka suangtuah dan ṭhin a ni," tiin Italian club-a a hlim thu a sawi.
Maribor leh Olympiakos
Slovenia club Maribor-in mualah Fierce Viler goal hmangin Hapoel Be'er Sheva 1-0 in an hneh a, Israel-ah 1-2 in chak lo mah se khualmuala goal an khung avangin group stage khel turin an tling.
Maribor hian Champions League group stage a vawi thum nan an thleng a, Israeli club Hapoel Be'er Sheva erawh season hnih chhung a zawnin playoff-ah an chak lo.
Olympiakos-in Croatian club Rijeka chu khualmualah German international player Marko Marin goal hmangin 1-0 in an hneh a, first leg-a 2-1 a an chakna nen 3-1 in hnehna an chang. Greek club Olympiakos hian a vawi 18-na atan Champions League group stage an thleng.
Playoff Results
Istanbul Basaksehir F.K. 1 - 2 Sevilla
IST : Elia 64'
SEV : Sergio Escudero 16'; Ben Yedder 84'
Sevilla 2 - 2 Istanbul Basaksehir F.K.
SEV : Sergio Escudero 52'; Ben Yedder 75'
IST : Elia 17'; Visca 83'
Agg-ah Sevilla 4-3 in an chak
Olympiakos Piraeus 2 - 1 Rijeka
OLY : V. Odjidja-Ofoe 66'; A. Romao 90'
RIJ : Heber 41'
Rijeka 0 - 1 Olympiakos Piraeus
OLY : Marin 25'
Agg-ah Olympiakos 3-1 in an chak
Celtic 5 - 0 Astana
CEL : E. Postnikov 32' (OG); Sinclair 42', 60'; Forrest 79'; Shitov 88' (OG)
Astana 4 - 3 Celtic
AST : Ajer 26' (OG); Muzhikov 48'; Twumasi 49', 69'
CEL : Sinclair 33'; Ntcham 80'; Griffiths 90'
Agg-ah Celtic 8-4 in an chak
Hapoel Be'er Sheva 2 - 1 Maribor
HAP : Nwakaeme 12'; Tzedek 45' (P)
MAR : Marcos Tavares 10'
Maribor 1- 0 Hapoel Be'er Sheva
MAR : Viler 15'
Agg-ah 2-2, away goal rule hmangin Maribor an chak
Napoli 2 - 0 Nice
NAP : Mertens 13'; Jorginho 70' (P)
Nice 0 - 2 Napoli
NAP : José Callejón 48' ; L. Insigne 89'
Agg-ah Napoli 4-0 in an chak