Sindhu tan hna harsa a awm lo

Olympic silver medallist PV Sindhu tan Glasgow-a neih mek Badminton World Championship last 16 lut turin harsatna a awm lo. Thawhlehnia second round inkhelah Sindhu hian Kim Hyo Min chu straight game-in an hneh.

Indian shuttler Sindhu hi tun ṭumah hian seeded palina niin first round a bye a, second round-ah hian minute 49 chhungin Korean nula Hyo Min lakah hian 21-16, 21-14 in hnehna a chang. Quarterfinal lut tur chuan Evgeniya Kosetskaya leh Cheung Ngan Yi te inkhela chak zawk a hneh leh a ngai dawn a ni.

Kum 22 mi Sindhu hian Hyo Min nen an intawn tawhnaah sulhnu a nei ṭha hle, ṭum nga an inkhelh tawhah vawi li ngawt hnehna a chang thei. Tun inelna hma an intawn hnuhnun ber chu 2016 Australian Open kha niin hemi ṭum hian Sindhu hi straight game-in an chak lo thung, tun ṭumah erawh result a danglam ta hle.

Indian shuttler dang zingah mipa singles lama inlan B Sai Praneeth leh Ajay Jayaram ten first round an paltlang a, hmeichhe doubles Ashwini Ponnappa leh N Sikki Reddy te ṭangdun bakah mixed doubles-a inkawp Pranaav Jerry Chopra leh N Sikki Reddy ten hnehna an chang ve bawk.