Mayweather v McGregor Muhammad Ali sulhnu chhui tur Mayweather

August 26 a lo thleng ang a, boxer awm tawh zinga ropui ber ang hiala inchhal Floyd Mayweather chuan boxing ring chhungah Conor McGregor a hmachhawn dawn - khawvelin he inhnek tur hi a nghakhlel a, chak tur zawkah pawh rin dan a in ang lo, boxing ngainatuten Mayweather lam an hawi a, UFC ngainatuten McGregor an beisei.

Boxing ring chhung la rap ngai lo McGregor-a'n vawi 49 inhnek a hmachhawn tawha tlawm hmel la hmu lo Mayweather a hmachhawn tur hi boxer tam takin an ngai thei lo a, Irish fighter hi awlsam taka tlawm turah an ngai vek - 'sum duh vanga lemchanna mai a ni' tih chu mi tam tak ngaihdan a ni.

Hmanah Ali...

Football leh Pele a inzawm a, Basketball leh Michael Jordan sawi zawm an ni ṭhin. Chutiang chiah chuan boxing sawi a nih apiangin Muhammad Ali sawi a ni ṭhin a, boxer awm tawh zinga ropui ber ang hiala chhal a ni. Ali leh Mayweather-in in anna an nei a, chu chu boxer ropui tak an nihna ve veah chauh a ni lo.

Kum 40 chuang liam ta khan Ali hian boxing khawvela tawnhriat la nei miah lo Japanese wrestler hmingthang Antonio Inoki chu Japan-ah a lo hmachhawn tawh a, mah se he 'fight' hian khawvel sawi zui erawh a hlawh lo - an beisei ang fight hmuhnawm mipuiin an hmu tlat lo, chu tak chu Mayweather leh McGregor inhnek turah pawh mi tam takin an hlauhthawn a ni.

A danglamna chu

June 26, 1976-a Ali leh Inoki inhmachhawn leh Mayweather leh McGregor inhnek turin danglamna a neih erawh danah a ni. Ali leh Inoki inbeihnaah boxing leh wrestling dan hman kawp a ni a, Las Vegas khawpuia McGregor-te inhmachhawn hunah erawh boxing dan hman a ni dawn.

Nippon Budokan arena-a Ali leh Inoki inhmachhawn hma hian American boxer Ali hian Richard Dunn lakah a world heavyweight kawnghren a hum hlim a ni a, June-a Japanese wrestler a hmachhawn hnuah September-ah inhnek a la hmabak bawk si. A hunlaia a trainer Angelo Dundee leh a doctor Ferdie Pacheco te chuan he fight hi hmachhawn lo turin an duh hle - Inoki hian a ke thawhin Ali banah a pet fuh an hlauh vang a ni. Chutiang chiah chuan McGregor-a'n a ke thawhin Mayweather a pet mai ang tih hlauhthawnna a lian hle.

Beisei phak lo

Tokyo khawpuiah Inoki leh Ali an inhmachhawn hmain 'lemchan' mai a ni lo maw? tia zawhna zawttu an tam a, Mayweather leh McGregor inkara zawhna tam tak pawh chu tho chu a ni. Ali-a'n, "Mipui bum turin engmah ka ti lo ang. Hei hi fight tak tak a ni a, engkim a tak vek a ni ngei dawn," tiin a sawifiah a, Mayweather leh McGregor-ten tour an neih kualnaa an sawi pawh chu tho chu a ni.

Ali leh Inoki an inhmachhawn ta ngei a, beisei a phak lo hle. Japanese wrestler Inoki-a'n bell a rik rualin Ali 'attack' nghal mah se a bak zawng a tho tawh lo a, chhuata mu chungin Ali a bei a ni ber. Round 15 an inbeih chhungin mit ti tlai 'fight' hmuh tur a awm lo a, a tawpah an in 'draw' a puan zui a ni bawk - beisei a phak lo tih piahlam a ni.

Sum vang

Mayweather leh McGregor ten dollar maktaduai 100 ve ve an hlawh pha tura ngaih a ni a, fighter pahnih hi sum duh vangin an inhmachhawn tih hai rual a ni lo. Boxing a chawlhsan hnua lo kir leh Mayweather-a'n, "Ka lo kir lehna tur khawp chuan sum a tam tur a ni," tiin sum vanga inhnek a nih thu a pha lo a, McGregor-a beisei ber pawh sum tih hai rual a ni lo.

Ali-a'n Japanese wrestler a hmachhawn avangin dollar maktaduai ruk a hlawh a, tunlai hun aṭanga chhutin a hlawh hi dollar maktaduai 20 ang vel a ni. Mahse, sum tam tak hlawh chhuak chungin mipui beisei fight hmuhnawm a chhawp thei lo a, "Inoki khan khatiang khan fight a hmachhawn dawn tih hria ila ka hmachhawn lo ang," tih chu Ali thusawi a ni.

Enge beisei tur?

Ali leh Inoki inhmachhawn aṭang­a chhutin Mayweather leh Mc­Gregor inhmachhawn turah fight hmuhnawm tak beisei chi a ni lo a, mah se tour an neih aṭanga anṭawngkam aṭanga teh tur a nih erawh chuan fight hmuhnawm tak a thleng dawn - Mayweather-a'n na taka McGregor hnek a duh thu a sawi bawhzuiin glove zang zawk hman a dil a, boxer pahnih hian 8oz (227 gram) glove an hmang dawn.

Ali-a'n Inoki a hmachhawn hnuah ngai a awh leh tawh lo a, hei hi amah enkawltu doctor Pacheco sawi ngei a nih piah lamah a hnua a record chu a hrilhfiahtu a ni. Inoki a hmachhawn hnu September-ah Norton hneh chhunzawm mah se khingpui knockout a nei tawh lo. Mayweather tan erawh chutiang hlauhthawn tur a awm lo a, huaisen takin McGregor hi a hmachhawn a nih loh chuan dem a hlawh ang.