EFL Cup 2017 Match 19 = player 274 inthlak; EFL a hlu tawk lo?
Thawhlehni zan EFL Cup-ah match 19 a awm a, club-ten cup match an khelh hmaa an league match hnuhnung bera an player chhawr aṭanga chhutin player 274 ngawt an thlak - chumi awmzia chu club ten EFL Cup an ngaihlu tawk lo tihna a ni.
Club paruk ngawtin an league match hnuhnung ber aṭangin an starting eleven tawp an thlak a, heng club zingah hian Premier League kai thar Brighton an tel. Premier League club zingah Crystal Palace leh Brighton fan-ten stadium an luah khat zo lo nasa hle.
Enge a chhan?
EFL Cup an khel a, ngaihdanah chuan club ṭan turin fans tam tak an kalkhawm tho tura ngaih a ni. Everton midfielder hlui, BBC Radio 5 Live tana thawk ta Leon Osman chuan, "Fan-ten an club-in an player
ṭha ber ber an khelhtir dawn lo tih an hriat chuan hun leh tha senga inkhel en an duh lo a ni," a ti.
Premier League club inlan zingah Leicester City-in Sheffield United an lenchilh a, mi 32,702 lenna stadium-ah fans 11,280 bak an kal thei lo. Osman chuan, "Premier League club hmachhawnna remchang an nei a, chutichung chuan Sheffield fans an kal ṭha lo. Club-in an player ṭha ber ber an chhawr dawn lo tih an hriat sa vang a ni thei a, hei hian inelna a ti hlu lo zo vek a ni," tiin a sawi.
Inkhel chu
Thawhlehni zan EFL Cup second round-ah Premier League club pasarih an inlan a, an zinga chak lo awmchhun chu Watford chiah an ni. League match hmasa bera Liverpool draw thei club hian Bristol City an hneh lo a, Championship club lakah hian 3-2 in an tlawm.
Bournemouth an vannei a, Birmingham lakah goal an chhuah hmasak zet hnuin an tho leh a, 2-1 in an chak. Crystal Palace chuan 2-1 bawkin Ipswich Town lakah hnehna an chang a, Championship club Ipswich hian an league match hnuhnung ber aṭangin starting eleven pumpui tawp an thlak - Palace hmachhawntu an player te kum chawhrual hi 20 hnuailam a ni.
Foxes an thiam
2015-16 Premier League champions Leicester City-in Sheffield khelmuala hnehna chang turin harsatna an tawk lo a, Demarai Gray, Islam Slimani (2) leh Ahmed Musa goal khung hmangin 4-1 in hnehna an chang. West Brom-in player paruk chauh thlak danglam chungin League Two club Accrington an lenchilh a, 3-1 in an chak.
Baggies tan nipui transfer-a pound maktaduai 12-a an lakluh Jay Rodriguez chuan a club thar tana a goal hmasa ber a khung a, Salomon Rondon khung tur a siamsak bawk. Rodriguez leh Rondon bakah hian Matt Phillips chuan goal khat a khung ve bawk. Baggies boss Pulis chuan, "Keini chuan he inelna hi tih mai mai kan tum lo a, Wembley-a min hruai thleng theitu a ni tih kan hria a ni," a ti.
Player langsar
Thawhlehni zan EFL Cup-ah Kemar Roofe a langsar a, Leeds United winger hian hattrick a siam - Newport County chu 5-1 ngawtin an sawp. John Terry vanga ngaihven hlawh Aston Villa-in hnehna an chang chiang a, Wigan Athletic chu 4-1 ngawtin an sawp.
Championship club hian an match hnuhnung pahnihah goal li ve ve an khung a, an league match hmasa pahniha hnehna an chan loh hnuah harhtharna an chang mek - Thawhlehni zan EFL Cup-ah erawh Terry a inlan lo. Bolton Wanderers leh Sheffield Wednesday inkhelah boruak a sang a, club pahnih manager chu hnawhchhuah ve ve an ni! Bolton hian 3-2 in hnehna an chang.