South Africa World Cup-ah dan bawhchhia an tam?

Russian hacking group Fancy Bears chuan tun hnaiah FIFA staff leh damdawi hman phal loh hman chungchang a thuneitu World Anti-Doping Agency (WADA) official ṭhenkhat thu inthawnna Email an hmuru (hack) a, kum 2010 World Cup-ah khan player 25 zet chuan a rukin dan an bawhchhia tih an tarlang.

Player dan bawhchhia an tar­lan zingah hian Premier League lama kan hmelhriat Dirk Kuyt, Gabriel Heinze, Juan Sebastian Veron leh Carlos Tevez te pawh an tel. England a football thuneitu sang Football Association chuan hetiang thil a thleng hi pawi an tih thu thuchhuah an siam nghal.

Fancy Bears-in an tarlan dan chuan heng player-te hian damdawi hman phal loh an hman bakah ṭhenkhat hi chu therapeutic use exemptions (TUEs) pek an nih thu an sawi. Infiamna huanga player ṭhenkhat, hliam emaw dam lohna nei zingah WADA-in a phal loh damdawi ei ngai a awm theih a, chung mite chuan dan hmanga dilna thehlutin phalna an hmuh hnuah TUEs hi pek theih a ni.

TUEs dil tur pawhin in­fiam­mite hian anmahni rama thuneitu International Federations (IFs) emaw National Anti-Doping Organizations (NADOs) emaw zawk hriatpuina an neih a ngai bawk. Player damṭha leh hrisel pangngai tan TUEs hi dila hmuh ngawt theih a ni lo.

Eng nge an sawi?

FA chuan thuchhuah siam nghalin, "Football Association chuan hetiang thil a thleng hi pawi a ti hle a, mipui hriat a puan zar ṭul lo thil langsar taka tihlan a ni hi a dik lo hle a ni. He thil thleng hi duh tawk china tih tawp ngawt theih a ni lo a, a tawp theih dan langsar tak pakhat chu dan bawhchhiatna kan tihtawp hmasak a ngai," an ti.

Football thuneitu sang ber FIFA chuan, "Fancy Bears-in dan lo taka infiammite thil an pho chhuak hi na takin a dem a ni. Mimal zalenna leh dikna chanvo in zah lohna a ni a, dam bawhchhia zawn chhuahna kawngah hna a ti harsa sawt ang tih a hlauhawm hle," tiin an sawi.

Player langsar

Manchester United striker hlui Tevez hi kum 2010 World Cup lai khan Manchester City player a ni a, Argentina tana a khelhpui Heinze pawh Old Trafford aṭanga French club Marseille a zawm kum a ni. Dutch forward Kuyt pawhin Liverpool jersey a la hak hun lai a ni bawk.

South Africa hmuna inelna lian neih lai hian Tevez, Heinze leh midfielder Juan Sebastian Veron te hian damdawi chi khat ei lai betamethasone an nei. He damdawi hi WADA-in a khap zingah tel chiah lo mah se ei hnem dana zirin intih chak theihna chikhat a ni thung a, ei dan tur pangngai baka ei hnem chu dan kalh a ni.

May thlaa football chawlh­santu Netherlands international hlui Kuyt hian World Cup lai khan a ha (tooth) na vang­in nachhawkna chikhat dexame­thasone a ei a ni. Germany inter­national Mario Gomez pawhin thawhah (asthma) damdawi atan salbutamol a ei ve bawk.

Tun ṭum hi Fancy Bears lam­in footballer bika TUEs chungchang mipui hmuh theih tura an phochhuahna hmasa ber a ni a, Blackburn leh QPR defender hlui Ryan Nelsen pawh dan bawhchhe zingah a hming a lang ve bawk.

Russia buaina

Nikum khan Russia hian an sorkar hriatpuina ngeiin an infiammite chu damdawi hman phal loh hman chungchangah dan an bawhchhiattir tih hmuh chhuah a ni a, he thil thleng vang hian Rio Olympic-ah khan Russian athlete-te chu neutral athlete ni chungin an inlan a ngaih phah.

World Championship lamah pawh Russia hremna hi kenkawh zui zel an ni a, an infiammite chu an ram aiawhin an inlan thei lo. Russia hian nakkumah FIFA World Cup a thleng dawn a, tun hnaia an ram a hacking group pakhat Fancy Bears-in infiamna langsar leh lian football chungchang a hetiang thu a rawn vawrh darh ta hian sawi zui a hlawh hle.