Chelsea coach thar Graham Potter

Thomas Tuchel an ban hnu lawkah Chelsea-in coach thar an lakluh thu an puang a, Ningani zan khan Brighton & Hove Albion coach Graham Potter chu inremna an neihpui thu an sawi.

Kum 47 mi coach hian Stamford Bridge-ah kum nga chhung cham turin contract a ziak a, English coach hmabak nei êng tak ni mah se club lian a la enkawl ngai loh avangin Potter tan chuan Chelsea enkawl hi chona hautak a tling.

Potter hian Brighton-a a thawhpui assistant Billy Reid, first-team coach Bjorn Hamberg leh Bruno, goalkeeping coach Ben Roberts leh assistant head of recruitment Kyle Macaulay te chu Chelsea-ah hian a chhawm a, London club hian Brighton hnenah zângnadawmna £21mtd an pe.

Ruahman dan hmasaah chuan Chelsea hian vawiin tlaiah Fulham hmachawn tur an ni - mahse, Queen Elizabeth II thihna avangin kartawp Premier League match-te sawn vek a ni a, manager thar Potter-a'n inbuatsaihna hun a neih tam theih phah dawn.

Chelsea an lawm
Blues-in Champions League nomawi meuh chawipuitu coach banin, thutlukna huaisenthlak tak an siam a, an tihfuh leh fuh loh chu hunin a hril ang - tunah rih chuan an duhtak coach an lakluh avangin Chelsea an hlim rih hle.

Chelsea chairman Todd Boehly chuan, "Chelsea-a Graham kan seng lut thei hi kan lawm takzet. Premier League-a a theihna kan hmuh sa leh ngaihdan thar nei ṭhin Coach, kan hmachhawpte leh a thil thlir dan inmil em em kan lalut a ni.

"Khelmual chhungah mai ni lo, khelmual pawn thlengin thiamna leh theihna sang tak a nei a, chu chuan hlawhtling lehzual turin Chelsea a pui thei ang tih ka ring. A club hluiah sulhnu ropui tak a hnutchhiah a, Chelsea-a danglamna a thlen tur hi nghakhlel takin kan thlir a ni," a ti.

Boehly chuan an coach thar chu a thlawp tur thu sawiin, "Graham, a coaching team leh squad ten an theihna tak tak an hmuh a, an hriat chhoh zel theih nana puih kan châk tawh takzet a ni," a ti a, nipui transfer-a £255.3mtd sengtu Boehly-a'n beiseina sang tak a nei.

A hlim e
Player a nih laia left back-a khel ṭhin Potter chuan, "Chelsea neitu tharte nena kan thawkho thei tur hi ka hlim a, player-te nena thawhho ka châk a, fan-ten an chhuan em em tur team din ka châk tawh hle a ni," a ti.

Potter hian a kalsan tak Brighton leh club chairman Tony Bloom chungah lawmthu a sawi a, kum thum chuang hret an hnena a cham chhunga an duhsakna leh thlawpna avangin lawmthu a sawi.

Brighton hi Under-21 coach Andrew Crofts chuan a enkawl lailawk dawn a, attacking midfielder Adam Lallana chu coaching team zingah telin player-coach a ni dawn bawk.

Seagulls (Brighton sawina) chairman Bloom chuan, "Graham-a'n min chhuahsan a ngai ta hi pawi ka ti a, season thum leh tlêm kan hnena a cham chhungin hna a thawk ṭha takzet. Mifel tak leh coach ṭha tak a ni a, kan club chuan kan ngai dawn hle a ni," tiin a thlah.

Sulhnu
Potter hian December 2010 khan Swedish fourth division club Ostersund enkawlin, head coach anga a zinkawng a zawh ṭan a, October 2015 a thlen meuh chuan Swedish top flight league-ah a hruai thleng der tawh!

June 2018 khan Championship club Swansea City a zawm a, FA Cup quarterfinal hial hruai thlengin Manchester City an ngam lo thung. Season khat chauh a cham hman tihin, May 2019 khan Brighton a zawm a, kum li atan contract a ziak.

Brighton hi a kaihhruai hmasak ber season-ah hian Premier League-ah 15-na a nihpui nghal a, season hmasa khan pakuana ni chungin season an khar - top flight league-a Brighton-in season an khar ṭhat ber ṭum a ni.

Potter hian season ṭan dawn khan a player pawimawh Yves Bissouma (Tottenham Hotspur) leh Marc Cucurella (Chelsea) te a chân a, heti chung hian league match rukah vawi li hnehna chanpuiin, palina an ni mek a, Chelsea a pansan ta.

A hlawh hnem!
Chelsea hian Tuchel thlaktu tur hian Tottenham coach hlui Mauricio Pochettino leh Sporting Lisbon boss Ruben Amorim an be hman nia sawi a ni a, Real Madrid legend Zinedine Zidane leh Leicester City coach Brendan Rodgers pawh hming chhawpchhuah zingah an tel.

Mahse, a tawpah Potter chu an inlung-rualna a ni a, coach ṭha tak ni mah se club langsar la enkawl ngai lo a nih avangin Chelsea a kaihhruai dan tur hi hmuh a châkawm hle.

Potter hian Brighton-ah khan kum khatah £2mtd a hlawh nia sawi a ni a, khawthlang media ṭhenkhat tarlan hi awih tur a nih chuan Chelsea-ah hian season khatah £12mtd a hlawh dawn!

Chelsea ban tak Thomas Tuchel khan Chelsea-ah hian kum khatah £7mtd a hlawh nia sawi a ni a, ani aia tawnhriat nei tlem leh sulhnu ropui lo zawk hlawh atana Chelsea insen ngam zat hi a tam hle - Premier League coach hlawh hnem palina a ni phak nghal a ni.