Football agent hlawh a tam

FIFA chuan nipui football transfer khar taka football agent-te hlawh zat a puangzar a, tun transfer-ah ringawt khan agent-te hlawh belhkhawm zat chu pound maktaduai 430.8 a ni!

Tun nipui transfer-a player transfer-naa sum hman ral zat ringawt chu pound tluklehdingawn 4.36 a tling a, heta ṭanga chhut hian agent te hlawh zat hi 10% a tling hial a ni.

FIFA report-a a lan danin football agent-ten nipui transfer fee aṭanga an sum lakluh zat hi, tun hnai kum 10 chhungin, 6.1% aṭangin 9.9% ah a pung hman a, nikum aia kumina transfer fee-a sum hman zat punna hi 29.7% a tling bawk - a punna hi a tam tham hle.

Nipui transfer-a sum hman tamna ber chu English football niin, Premier League ringawtin £1.9tld an hmang a, Manchester United-in £81.3mtd-a Antony an lakluh chu Premier League transfer tawp nia player lakluh man to ber record a ni bawk.

English football transfer chu September 1 zan, keini lam sanaa September 2, zing dar 3:30-ah khan khar a ni a, hetihlai hian European ram ṭhenkhat chu a la inhawng reng a, Turkey pawh nimin khan a tawp ve chauh.

Hmeichhe football-ah international transfer 684 thlengin, nikum nena khaikhina a sanna hi 14.4% a ni a, mipa lamah chuan 16.2% a sang chhoin, 9717 transfer a awm a ni.