Kartawpah Premier League inkhel a awm dawn lo

Premier League inkhel chhuanlama zan inkhawm peih lo tan pawh chhuanlam tur a awm ta lo - Queen Elizabeth II thihna avangin kartawp Premier League inkhel tur chu sawn a ni a, he thu buatsaih a nih lai hian fixture sawn takte khelh leh hun tur erawh tihchian a la ni lo thung.

Kum 70 chhung UK Lal ni a, Lal dinhmun luah rei ber Queen Elizabeth II hi Ningani zan khan a thi a, kum 96 mi a ni. Infiamna khawvelin Queen Elizabeth II thih thu an hriat rualin a sunna pawh uar takin an tilang a, Premier League khelh hun meuh sawn a ni ta.

Premier League khelh hun chauh sawn a ni lo a, tun kar tawpa English football-a inkhel tur awm zawng zawng chu sawn vek a ni - grassroots football pawh khelh a ni dawn lo!

English Football League hnuaia Championship, League One leh League Two te, non-league tia hriat lar ṭhin National League te, FA Trophy leh Women's Super League inkhel tur zawng zawng pawh sawn vek a ni.

Premier League chuan ram leh hnam tana Queen Elizabeth II hnathawhte hriatreng nana inkhelh hun chu sawn an nih thu an sawi a, PL chief executive Richard Masters chuan, "Keini leh kan club te chuan kan ram tana a hnathawh avangin zahna lantir ve kan duh a ni.

"He hun hi kan ram tan mai ni lo, khawvel hmun hrang hranga Queen Elizabeth II ngainatute tan hun lungchhiatthlak tak a ni a, amah uitute chu he hun thimah hian kan zawm ve a ni," a ti.

Britain sorkar chuan infiamna fixture ruahman sa chawlhtir chu anmahni pawl ṭheuh kutah an dah thu an sawi a, heti chung hian PGA Championship, British horse racing leh England leh South Africa ten test cricket an khelh tur chu ṭhulh vek a ni.