US Open Final ; Swiatek hmachhawn tur Jabeur
Iga Swiatek chuan Aryna Sabalenka hnehin US Open final a lut. World number 1 hian semifinal lehlama hnehna changtu Ons Jabeur nen Inrinni zan dar 1:30-ah nomawi an inchuh dawn, a tu emaw chu chu a vawi khat nan New York khawpuiah an champion dawn tihna a ni.
Semifinal inkhel hmuhnawmah Swiatek hian Sabalenka lakah set hloh hmasa mah se, darkar hnih leh minute 11 an inkhelh hnuah 3-6, 6-1, 6-4 in hnehna a chang, inkhel dangah Jabeur chuan 6-1, 6-3 in Caroline Garcia a hneh ve bawk.
Season kal laiah chuan Swiatek leh Jabeur te hi player kaltluang leh che ṭha an ni a, inelna lian zinga a hnuhnung ber US Open nomawi an inchuh tur pawh hi a awm hle, a tu zawk pawh champion ni se an phu khawp ang.
Tun hmain player pahnih hi vawi li an intawng tawh, vawi hnih ve ve hnehna an chang - an inhlau lo tawn dawn, inkhel hmuhnawm bakah class sang tak an chhawp chhuak ngei ang tih a sawi ngam.
Thil thar
Tun hmain Polish nula zingah US Open final lut thei an la awm ngai lo, record duhawm lo tak an neih hi tunah chuan Swiatek-i'n a rawn vaw ṭhiat a, an ram nula zinga final khel thei hmasa ber a ni dawn - champion hmasa nih nghal a tum ang.
Tunisian nula Jabeur pawh hi an ram aiawh mai a ni lo, an khawmualpui Africa aiawhtu a ni tel. African nula zingah (Open Era chin) US Open final khel thei an la awm ngai lo, an ram mai ni loin a khawmualpui ang tawpa ṭan rawn hlawh tur a ni ang.
Swiatek-i'n French Open nomawi vawi hnih a chawi tawh a, a tan Grand Slam final boruak hi thil thar a ni hran lo. Jabeur pawhin Wimbledon final kha a khel a, mahse a chak lo zawkah a ṭang, a zawna major tournament final khel thei a nihna hi a nep lo hle.
A harsa dawn
Final thlir lawkin Swiatek chuan, "Jabeur hian ṭhatna lai a ngah hle, a bik takin baseline aṭanga ball vuak a thiam. A khelh dan phung hi tun hmain ka lo zirchiang tawh ṭhin, mahse game chu danglam thei reng a ni tih erawh hriat a ngai ve bawk.
"Inkhel awlsam ka beisei lo a, mahni inveng ringawt loa khingpuite nawr chi a nih avangin inven dan tur pawh ka ngaihtuah tel a ngai. Ka game dik tak khelh chhuah tumin ka bei ang," tiin a sawi a, chak lo zawk nih a tum lo.
Swiatek tan hard court hi a inkhelh thiam berna hmun a ni hran lo. A nihna takah chuan tun US Open-ah pawh duhthusama ṭhain a khel meuh lo, mahse chak dan a hre tlat si. Champion tur chuan tihsual avanga a khingpui point a pek ṭhin a tih tlem a pawimawh ang.
Inrintawkna chu
Kum 28 mi Jabeur hi tun dinhmunah world number 5 a ni a, a khingpui tur Swiatek hi number 1 a ni thung. An ranking chhut chuan Jabeur a hniam zawk a ni mai thei, nomawi inchuhnaah erawh hnuaihnung zawk nih a tum bik lo.
Tunisian star chuan, "Wimbledon kan khelh zawh hnuah khan ka lakah beiseina hrang hrang a awm, a nihna takah chuan rilru pawh a luah ve ṭhin hle. Amaherawhchu, pressure ka insiam duh lo, a ṭha zawnga chhawr zel ka tum zawk.
"Mipui lamin Swiatek hi chak turin an ring zawk tih ka hria, ka zam phah lem lo. Hei leh chen ka kal thei a nih chuan ka hmaa tih tur awm hlen chhuak turin ka bei ang," tiin a sawi a, tharum a neih ṭhat a chhawr thiam a nih chuan chak thei a ni.