Hliam vangin Real Madrid an talbuai

Real Madrid fan-ten chanchin lawmawm lo hriat tur an neih belh leh ta a, Champions League-a Celtic an hneh ṭuma inhliam Eder Militao chu ni sarih aṭanga ni 10 tal a chawlh a ngaih tur thu an sawi.

Madrid hian Pathianni tlai dar 5:30-ah league match khel turin Real Mallorca an mikhual dawn a, Militao a inlan thei dawn lo tihna a ni - September 14 zana Champions League match khel tura RB Leipzig an mikhual hunah pawh a inlan thei lo ang.

Real tana chanchin lawmawm erawh Madrid derby-a inlan turin Militao hi a dam hman a beisei awm a, September 18 zanah Atletico Madrid an lenchilh dawn a ni.

Madrid khaw club hian Celtic nena an inkhelh ṭumin hliam vangin an thiampuipa Karim Benzema an la chhuak bawk a, French striker hi malpui hliam vangin kar hnih vel tal a chawlh a ngai dawn.

Kum 34 mi Benzema hian tun season inelna hrang hrangah match ruk khelin goal li a khung leh der tawh a, a dinhmun thlirin Atletico a hmachhawn theih a rinawm loh - Rodrygo Goes emaw Eden Hazard emawin a hmun ruak an luah a ṭul ang.

Real chuan Benzema chawlh chen tur tak hi tarlang lo mah se Spanish media-te chuan October 2 thleng chu a chawlh an rin thu an tarlang a, league-ah Mallorca leh Atletico hmachhawn loin, Champions League-ah Leipzig a hmachhawn dawn lo bawk.

Benzema inhliam hi France tan pawh chânna a tling dawn a, UEFA Nations League-a Austria leh Denmark an hmachhawn hunah a inlan thei dawn lo - September thla tawp lamah international break a awm dawn a ni.