Venghnuai leh Bethlehem inkhelah goal ruk a lut
Nimin Zote Honda Mizoram Premier League Season 9 inkhelah FC Venghnuai leh FC Bethlehem 3-3 in an inhnehtawk. Bethlehemin MPL match an khelh hmasak berah point hlu tak an hlawh chhuak.
RG Stadium inkhelah Venghnuai tan Vanlalthanga, H. Lalrempuia leh Lalrammuanpuia ten an khung a, Bethlehem tan Lalbiakdika, Lalruatpuia leh Moses Lalrinzuala tan an khung ve bawk.
Thanga ke veilam
Bethlehemin MPL match an khelh hmasak berah bul an ṭan ṭha a, an che vel pawh a hmuhnawm. MPL kai tharin game nung tak an khel a, FC Venghnuai an insiamrem lawk thei lo.
Minute linaah player lakluh thar Sena Ralte ball vawrhluh chu Lalbiakdika'n a tauh goal. Bethlehemin goal hmahruai an khung zawhah inkhel an thunun a, chance ṭha bik erawh an ngah lo.
Sena Ralte freekick pet ṭha zet chu keeper Joel B. Lalramchhana'n khawih hmanin crossbar a per a, hemi per hi Lalnunzira'n pet nghal mah se Venghnuai player-in an dang hman.
Venghnuaiin insiamrem turin player ṭha an mamawh a, Vanlalthanga chu mamawh chhanna a ni. Hualnghohmun midfielder Thanga hian minute 41-naah freekick aṭangin mawi zetin a khung.
Rindika Hmar hote an phur zui a, na taka an nawr chhunzawm rah an seng. Injury time-ah Thanga freekick vawrhluh chu Thangzawmsanga'n tauh pialin H. Lalrempuia'n a volley goal. Venghnuaiin first half an khar ṭha a, 2-1 in hma an hruai ta zawk.
Bethlehem hun
Second half-ah Bethlehem bawkin bul an ṭan ṭha a, Venghnuaiin goal an khung hmasa zawk. I Day Football 2022 top scorer Lalrammuanpuia'n (Apuia) defender Sena Ralte laka a penalty hlawhchhuah chu minute 56-naah a khung.
Venghnuaiin 3-1 in hma an hruai a, point thum an hmu ngei turah a ngaih theih. Mahse Bethlehem hun a thleng a, an vannei tel bawk.
Bethlehem substitute Lalruatpuia ball lak per chu Venghnuai keeper Ramchhana'n a save per a, Rempuia hmai fuhin goal-ah a lut. Minute 71-naah 3-2 a nih avangin inkhel a nung thar hle.
Bethlehemin minute hnih hnuah si phurh an sut zo a, minute 73-naah Lalpianthanga cross chu Moses Lalrinzuala'n khawih pial zeuhin goal kilah a dah.
MPL kai thar Bethlehem an khel ṭha chhunzawm a, goal hmuh tur erawh a awm tawh lo. Lalnunzira ball pet chu goal chungah chiah a kal a, F. Lallawmkima'n chance ṭha bik a neih chu goal zawnah a tauh thei lo bawk.
Coach thukhawchang
FC Venghnuai coach Lalrindika Hmar chuan, "Kan khel ṭha lo a, kan result-ah kan lungawi a ṭul. Chutihrualin 3-1 a hma kan hruai tawh avangin chak thei kan ni a, hun ṭha kan bawhpelh a ni," tiin Vanglaini a hrilh.
FC Bethlehem coach Victor Lalbiakmawia chuan, "Penalty chungchang chu sawi zui ṭulah ka ngai lo - penalty tur a ni lo. Kan khel ṭha viau a, kan tihsualah goal kan chhuah leh ṭhin a, a pawi a ni. Chutihrualin point hmu lo thei dinhmuna kan din hnuah point khat kan hlawh chhuak a, hun tawp thlenga theihtawp chhuahtu kan naute chungah ka lawm hle," tiin Vanglaini a hrilh.
MPL
#Round 1 - 9.09.22
FC Venghnuai 3 - 3 FC Bethlehem
FCV : Vanlalthanga 41'; H. Lalrempuia 45+2'; Lalrammuanpuia 56'
FCB : Lalbiakdika 4'; Lalruatpuia 71'; Moses Lalrinzuala 73'
MoM : Sena Ralte, FC Bethlehem