Electric Veng aia vannei Chanmari
Zote Honda Mizoram Premier League-ah Chanmari FC-in chakin bul an ṭan a, nimin tlai inkhelah Electric Veng 1-0 in an hneh. Goal awmchhun hi substitute F. Lalnuntluanga'n penalty aṭanga a khung a ni.
A goal lo
Chanmari leh Electric Veng ten nung takin inkhel bul an ṭan a, goal chance hmuh tur pawh a awm ṭha.
Electric Veng captain David Lalchhuanawma'n box chhungah Vanlalremkima (Tetea) shot chu la thlain chance ṭha bik nei mah se goal pawnah a pet.
Chanmari pawhin chance ṭha an nei, Lalremruata leh Lalnunzira Sailo te an inthlawp ṭhat zarah H. Lalmuankima'n chance ṭha a nei a, goal vei lam a ruak a vek chungin crossbar chungah a pet.
Team pahnih an innawr chhunzawm a, darkar chanve hnuah erawh inkhel a thi. Chutihrualin hun tawp hmain Electric Veng winger Vanlalremsanga'n goal ban a tauh per a, goal hmuh tur erawh a awm lo.
Danglamna Penalty
Halftime-ah an infuih ṭha a, second half-ah passing game hmuh tur a awm. Chanmari striker Lalnunzira Sailo-in keeper chauh a hmachhawn a, EFC keeper C. Vanlalhriata'n a dansak.
Electric Veng an vanduai zui a, defender Malsawmhlua'n box chhung aṭangin ball a pet chhuak a, ball-in a kut a fuh avangin Chanmari player-ten handball tiin an au rual. Referee-in penalty spot a kawk a, Chanmari tan substitute Tluangtea rawn pen chhuakin minute 66-naah chiang takin a pet goal.
Electric Vengin siphurh sutna remchang an nei nghal a, Vanlalremsanga'n a hun ṭha neih chu keeper Malsawmdawngliana zawnah a pet. Hemi hnu hian Remsanga hian keeper Msa chauh a hmachhawm a, forward David-a pass tum mah se a pek dik loh avangin a goal lo.
Eng nge an sawi?
Chanmari FC coach Rochhingpuia chuan, "Chak hi a hlu. MPL match hmasa bera hnehna kan chang hi ka lawm. Kan khel chhe lo a, insiamṭhatna tur erawh kan ngah," tiin Vanglaini a hrilh.
Electric Veng FC manager Vanlalsawma Colney chuan, "Kan khelh danah ka lawm a, ka naute chungah beiseina ka nei sang lehzual. Kan chak zo lo erawh pawi ka ti a, kan vanduai vangah ka ngai," tiin a sawi ve bawk.
Nimin inkhelah hian Electric Vengin kumin January thlaa thi, an player hlui Hnahthial tlangval Chullova hriat reng nan ribbon dum an hreng a ni.
Chanmari FC 1 - 0 Electric Veng FC
CFC : F. Lalnuntluanga 66' (P)
MoM : Lalremruata (J. No. 17), Chanmari FC