Europa League-ah Man United chak lo
Manchester United chuan Cristiano Ronaldo hoin Europa League an khel a, team ṭha leh chak zawk tura rinkai ni mah se an mikhual Real Sociedad lakah 1-0 in an tlawm - Erik ten Hag-a'n player ṭha ṭhenkhat dah ṭha chungin a beisei ang result a hmu lo.
Ningani zan inkhel dangah Arsenal erawh an chak. Gunners hian an mikhualna ramah player ṭha an hahchawlhtir ve tho, mahse Zurich chu 2-1 in an luhchhuah. Mikel Arteta nauten point thum nen bul an ṭan.
United an tlawm
Inkhel ṭan hmain Queen Elizabeth II thih thu hriat a ni, inkhel turin Spanish club hi England-ah an awm a ni saltiah lo, an inbuatsaih fel vek tawh. Football Association leh UEFA an inbe rawn a, a hun pangngaiah an inkhel ta tho.
Mahse, Old Trafford-ah sunna hun hman a ni a, match danga an tih ṭhin rimawi ang kha tih rik a ni lo, player ten a sun nan armband dum an hreng bawk. Inkhel an ṭan hnuah erawh fans lamin theihtawp chhuahin an club ṭante an au thei.
Goal kan hmu mai lo a, second half-ah Brais Mendez chuan Sociedad tan goal awmchhun a khung. Bench aṭanga lut Lisandro Martinez-a'n handball vangin penalty a chawi a, he hun remchang hi chakna goal khung nan a hmang.
Man United tan Ronaldo-a'n Diogo Dalot-a cross a tauh luh chu offside vanga hnawlsak a ni, second half-ah tho Ronaldo hian Bruno Fernandes ball pek ṭha tak dawng mah se goal zawnah a tauh thei lo.
Premier League lama chhawr rim loh Harry Maguire, Fred leh Ronaldo ten inkhel bul an ṭan a, Real Madrid aṭanga an lak thar Casemiro chuan a vawi khat nan bul ṭan ve mah se, an match hnuhnunga Arsenal an hnehna game nen chuan a inthlau hle.
Laipui a puak
Mikel Arteta-a'n season kal laia a chhawr rim zingah - Gabriel Martinelli, Granit Xhaka, Kieran Tierney leh Gabriel te chauh bul a ṭan tir a, an match hnuhnung berah Man United ngam lo mah se Zurich lakah thawhchhuah an inring hle.
Swiss club lamin an nawr kar lakah Gunners hian counter attack aṭangin an vaw let. Striker Eddie Nketiah chuan chak zeta ball a tlanpui hnuah Marquinhos tan a siamsak, a club tana a match hmasa ber kheltu Marquinhos hian laklawh nei miah loin a khung.
Gabriel Jesus awm vanga khelhna chang tam lo Nketiah a langsar a, mahse penalty a chawi avangin Mirlind Kryeziu chuan si phurh a sut phah. Amaherawhchu, Nketiah hian chakna goal a khung leh ta tho a, Nilaini zan inkhelah chuan mimal langsar fal ber a ni chiang hle.
English striker Nketiah hian khelhna hmun chan tam a duh a, season hmasa tawp lamah kha chuan rinrawl a ni phak. Mahse, Jesus awm chinah erawh enkan a hlawh leh rih, khelmualah hun hmang tam tawk lo mah se a remchang neih ang erawh a hmang ṭha ṭhin viau.
Arsenal hian Pathianni zanah Everton mikhual tur an ni a, mahse a hun an sawn. September 16, Ningani zanah PSV Eindhoven nen an inkhelh leh dawn, Arteta nau ten inbuatsaihna hun an neih belh.
Europe - UEFA Europa League
Zurich 1 - 2 Arsenal
PSV 1 - 1 Bodo/Glimt
AEK Larnaca 1 - 2 Rennes
Fenerbahce 2 - 1 Dinamo Kiev
Ludogorets 2 - 1 AS Roma
HJK 0 - 2 Real Betis
Malmo 0 - 2 Sporting Braga
Union Berlin 0 - 1 Union Saint-Gilloise
Manchester United 0 - 1 Real Sociedad
Omonia Nicosia 0 - 3 Sheriff
Lazio 4 - 2 Feyenoord
Sturm Graz 1 - 0 Midtjylland
Freiburg 2 - 1 Qarabag
Nantes 2 - 1 Olympiakos
Red Star Belgrade 0 - 1 AS Monaco
Ferencvaros 3 - 2 Trabzonspor