Galatasaray-ah Icardi leh Mata

Paris Saint-Germain striker Mauro Icardi leh Manchester United midfielder hlui Juan Mata te chuan Galatasaray an zawm, anni pahnih an nei thei hi Turkish club tan chuan ṭhatpui tham an ni ang.

Icardi hian PSG-ah khelhna a chang meuh lo, inkhelh a duh a nih chuan chhuah mai hi a tan thutlukna dik a ni. Argentina international hian 2019 khan PSG a zawm, inelna hrang hrangah match 92 aṭangin goal 38 a khungsak hman.

Goal a kung thei pangngai viau, mahse Lionel Messi, Neymar leh Kylian Mbappe te an awm a, anni pathum hi an dam a nih phawt chuan khawih chet theih loh an ni a, tlarhma lamah midang tan hmun a awm lo.

Mata erawhin kum khat cham turin contract pangngai a ziak thung. Kum 34 mi midfielder hian season hmasa khan Man United tana a contract a hmang zo, club nei loa awm lai a nih avangin a duhzawng club a zawm thei.

Spanish mindfielder chuan, "Ka ṭhiante chuan Galatasaray nawmzia leh a boruak ṭhat thu min hrilh, football mai bakah nunphung a nuam tih an sawi tel bawk. Chona thar a ni dawn a, eng ang tak nge ka thlen theih tih hriat ka châk tawh hle," tiin a sawi.