Champions League khel tur Liverpool

Hoffenheim head coach Julian Nagelsmann-a'n, "Anfield-a kan khelh dawn vang maiin kan zam lo a, 2-0 a chak kan tum ang a, 3-0 phei chu a duhawm lehzual ang," tiin sawi mah se, a thusawi leh a naute khelh dan a inang lo - Liverpool hmaah 4-2 ngawtin an tlawm a, inkhel hmasa nena belh­khawma Reds chakna chu 6-3 a ni.

Liverpool-in season tharah Champions League an khel dawn chiang a, a vawi khat nan English club pangain Champions League group stage an khel dawn tihna a ni - Reds hma hian Premier League champion Chelsea, pahnihna Tottenham Hotspur, pathumna Manchester City leh Europa League champion Manchester United-te chu Champions League khel turin an tling tawh.

20 mins
Liverpool-in khualmualah 2-1 a hnehna an chan tawh avangin playoff paltlang tur chuan goal khat aia tam chhuah loh a tawk tih hre mah se attacking football an khel nghal a, minute 20 a ral meuh chuan Champions League khel tur a chiang tawh! Minute 10-na lekah Emre Can chuan Reds tan goal hmahruai a khung a, Sadio Mane thawhrah a ni.

Goal hmahruai an khung aṭangin minute riat a liam hman chauh ang tihah Liverpool an inlar nawn a, Georginio Wijnaldum-a'n post a pet perna let lehlam chu Mohamed Salah chuan awlsam takin goal-ah a chantir. Minute hnih a liam leh a, goal bawk kan hmu - a khungtu pawh Liverpool bawk! Can chuan match khata goal hnih a khungna hmasa ber ni turin Roberto Firmino ball siamsak ṭha zet chu a khung. Liverpool-in goal thum an khung hian minute 20 chauh a la ni!

Hoffenheim harhna
German club beisei angin thil a kal lo a, minute 20-ah goal thum an chhuah avangin coach Nagelsmann-a'n a naute khelh dan a thlak. Tlarhnunga player panga chu player paliah a ti tlem a, striker Mark Uth chu goal khung tura luhtir a ni. First leg-a Reds lama goal lo khung tawhtu striker hian a hna a thawk nghal a, minute 28-naah an si phurh a sut ṭhen.

Chawlhlawk hman a ni a, 3-1 in Reds-in hma an hruai. Hoffenheim-in goal khat hmanga beiseina chhe te an neih erawh Firmino-a'n minute 63-naah a hmeh mih sak a, captain Jordan Henderson-a'n hmasial lo taka a siamsak chu Brazilian for­ward hian a club hlui lamah a khung. Lammuala inkhel tawh Hoffen­heim-in Sandro Wagner hmangin goal khat khung ve leh mah se awmzia erawh a nei phak tawh lo.

Reds tlarhma = Boom!
Khualmuala an chak tawh avangin Liverpool chu dinhmun ṭha sa ni mah se Jurgen Klopp-a'n a naute attacking football hmuhnawm a khelhtir a, tlarhmaa Salah, Firmino leh Mane inkawp chu Hoffenheim tlarhnung tan manganna tham a ni - Philippe Coutinho a la tel lo.

Liverpool buaina erawh sawi nawn fo a ngai - tlarhnung a ni. Minute 20 chhunga goal thum an khung theihna club lakah goal hnih an chhuah a, an goal chhuah hi defending pherh vanga puh theih ve ve a ni - August 31-ah nipui transfer a tawp dawn a, Klopp-a'n tlarhnung buaina chingfel turin transfer bazar lamah a mit a len a ṭul ang.

Eng nge an sawi?
Liverpool manager Jurgen Klopp chuan, "A hma thei ang bera engkim chinfel kha kan duh dan chu a ni a, kan beisein kan tih hlawhtlin avangin ka hlim a ni. Playoff-a hmachhawn theih zingah Hoffenheim leh Napoli kha kan huphurh ber an ni a, game hnih harsa takah hnehna kan chang thei," tiin a naute khelh danah a lawm thu a sawi.

Kum 30 mi, Hoffenheim coach Nagelsmann chuan, "Kan ruahman angin kan khel chhuak lo a, Reds kha kan nawr thei thlawt lo a ni ber. Liverpool khan kan rin lawk ang ngeiin an rawn khel a, kan tlarhnung kan ngaihthah kha a pawi a ni. Ka naute khan mimal tan an khel a, minute 30 a tlin hma kha chuan player ṭhenkhat kha chu kan kawl lo emaw tih mai tur a ni," tiin a naute khelh danah a lungawi lo.

Inkhel Chhehvel
• Liverpool-in 2014-15 season hnua a vawi khat nan Champions League an khel ve leh dawn ta.
• Reds hi Europe-ah khualmuala hnehna an chan hmasak tawhna inkhelah hnawhchhuah an ni ngai lo.
• March 1997 hnuah Liverpool-in Europe-ah an khelmuala a zawna goal thum aia tam an khung lehna hmasa ber a ni.
• Liverpool-in Anfield-a German club an mikhual hnuhnung parukah hnehna an chang vek.
• Klopp-a'n Reds a enkawl hnuah Anfield-ah European game match sarihah a naute a kaihruai a, vawi ruk hnehna a chang - November 2010 hnua Reds record ṭha ber a ni.
• Sadio Mane-a'n Anfield-ah Reds tan match 17 khel tawhin goal 15-ah a inrawlh - goal 10 a khung a, assist vawi nga a nei.
• Mark Uth-a'n goal a khung chiah khan Anfield-a Simon Mignolet-a'n minute 313 hnua goal a chhuah lehna hmasa ber a ni.