Zaninah MPL6 Kickoff

Tualchhung football ngainatute nghahlelh Mizoram Premier League Season 6 khelh nan ni ruk chiah a awm tawh. Zanin hian a khuh hnawnna MPL6 Kickoff chu Chanmari YMA Hall-ah neih a ni dawn.

Helai hmun hi kum nga liam taa Indian football legend Bhaichung Bhutia-a'n MPL Kickoff a neihna hmun kha a ni a, tun ṭumah hian Indian football-a mi pawimawh ber pawl Chirag Tanna-a'n kickoff a nei thung ang.

MPL Kickoff-ah hian kum dang ang thoin MPL Handbook leh club jersey pariat pholanna hun neih a ni dawn a, MPL club pariat captain ten thu an tiam bawk ang.

MPL club pariat zinga club paruk MPL champion Chanmari FC, I Day Football leh MFA Super Cup champion Chhinga Veng FC, Chanmari West FC, Dinthar FC, Mizoram Police FC leh Ramhlun North FC ten Vakiria ṭhui an ha ang a, I League champion Aizawl FC-in Kolkata company Vamos siam an inbel ang a, Bethlehem Vengthlang FC-in RIN RIN kut chhuak an ha thung ang.

Tun ṭumah hian lawmpuina hlanna hun hman a ni dawn a, MPL chul ni zinga I League-a champion hmasa ber Aizawl FC MPL Board-in lawmpuina an hlan dawn.

MPL Kickoff hmasa ber hi kum 2012 khan India ram footballer zinga hming dai tawh lo tur Bhaichung Bhutia-a'n hawnna a nei a, hemi hnu hian Mizoram football hmel a danglam.

Tun hmaa India ram pum inelnaa result chhuan tur nghah lo Mizoram-in MPL awm hnuah Santosh Trophy-ah an champion a, National Games-ah gold medal an lak bakah MPL club AFC-in I League an champion. Heng inelna lian pathum bakah football hmanga Mizoram lansarhna sawi tur a awm ṭeuh bawk.

Sikkimese Sniper tiha hming lem an vuah Bhaichung-a'n MPL Kickoff a neih hnuah hian Lal Thanzara (MPL2, MPL4) leh Larsing Ming (MPL5) bakah grassroots hmeichhia leh mipa naupang ten (MPL3) MPL kickoff hi an nei tawh.

MPL6 kickoff neitu tur Chirag Tanna hi Reliance Sports-ah general manager nilai a ni a, Indian Super League buaipuitu i pawimawh zinga mi a ni. Amah hi AIFF League Committee-ah IMG Reliance aiawha telin member a ni mek.

MPL6 hi sponsor-tu hming chawiin Mc Dowell's No. 1 Soda Mizoram Premier League Season 6 powered by Active Pixel tih a ni ang. Inelna hi August 31, Ninganiah Lammualah khelh ṭan a ni ang a, match hmasa berah Ramhlun North leh Aizawl FC an inkhel ang a, zan lamah Bethlehem Vengthlang leh Chanmari West FC te an inkhel ang.

MPL Board-in a rel angin Round 1-7 inkhelh ṭan hun hi tlai dar 3:00 a ni ang a, zan inkhel hi dar 7:30-ah ṭan a ni thung ang.

MPL KICKOFF
A hmun Chanmari YMA Hall
Chief Guest Chirag Tanna (IMG Reliance)
Registration ṭan hun 6:45 PM
Briefing 7:00 PM - 7:30 PM
Function ṭan hun 8:00 PM
Host K. Vanlalruata
Zai TBC Zaithanpuia
Welcome Speech Lal Thanzara, President MFA
Zai Zorinzuali Khiangte
Oath Taking Team captains
Handbook Tlangzarh
Aizawl FC lawmpuina hlan
Zai Feli Fanai
Registration Booklet Tlangzarh
Jersey Pholanna Club models
Speech & Kickoff Chirag Tanna