Kerala Blasters striker thar Berbatov
Manchester United striker hlui Dimitar Berbatov chuan Indian Super League khel turin Kerala Blasters a zawm a, kum khat chhung atan contract a ziak. Bulgarian striker hi marquee player a ni dawn a, chumi awmzia chu ISL-in club tinin squad pumpui hlawhah vaibelchhe 18 aia tam an hmang thei lo ang a tih huang chhungah Berbatov hi a awm dawn lo tihna a ni - kum khatah vaibelchhe 7.5 hlawh tur anga sawi a ni.
Kum 36 mi striker hian June 2016-a Greek club PAOK Salonika a chhuahsan hnuah club nei loin a awm reng a, April thla khan Premier League club ṭhenkhat nen indawrna an nei nia sawi ni mah se sum tamna ISL lam a pan. Bulgaria tan match 78-a khelha goal 48 khungtu hi an ram tana goal khung hnem ber a ni a, Manchester United tan a khelh laiin Premier League (2) leh League Cup (1) a chawi hman.
PFA Premier League Team of the Year (2006-07, 2010-11) ah ṭum hnih a lang a, Premier League top scorer vawi khat ni tawhin Fulham, AS Monaco leh Tottenham tana a khelh laiin Club Player of the Year dinhmun a luah vek thei. ISL a pan hma hian club hrang hrang tan match 656 a khelhah goal 280 a khung a, season khata goal a khung hnem ber chu 2004-05 khan tawngin Bayer Leverkusen tan goal 26 a khung.