Alexis a inkhel tawh dawn - Wenger

Arsenal manager Arsene Wenger chuan Pathianni zana Liverpool nen Premier League an khelh hunah forward Alexis Sanchez a inlan tur thu a sawi chiang.

Wenger chuan, "Alexis-a'n training-na lamah a theih tawp a chhuah reng a, tun hma ang bawkin a theihna zawng zawng a hlan a ni. Hun rei tak khelmual chhungah a hmel hmu tawh lo mah ila kartawpah chuan a inkhel thei tawh ang," tiin a sawi. Wenger hian an inkhelh hun tur chu Pathianni daih a la nih avangin bul a ṭantir dawn leh dawn loh a la sawi chiang thei lo thung.

Chile internatioanl Sanchez hi Confederation Cup a khelh avangin nipui chawlh pek rei bik a ni a, club a zawm leh hnuah a dam loh zui avangin tun season league match pahnihah a hmel kan la hmu lo.

Barcelona forward hlui contract chungchang zawhna chhangin Wenger chuan, "Tunah chuan contract thar kan la ziak fel lo, kan ngaihtuah ber chu team ṭha tak din a ni a, player contract thar chungchang hi kan ngaihpawimawh ber a ni rih lo," a ti.

Arsenal player zingah season tawpa ruala contract tawp tur an awm nual a, chung zingah chuan midfielder Alex Oxlade-Chamberlain pawh a tel. England international hi Premier League champion Chelsea chuan an ngaihven hle nia sawi a ni.

Gunners manager Wenger chuan, "Alex hi kan hnena cham zel turin ka duh. Khawvela player ṭha berte zinga mi a ni tawh a, hma hun eng tak nei a ni bawk," tiin Chamberlain chu Arsenal jersey ha chhunzawm zel tura a duh thu a sawi. Wenger hian AS Monaco aṭanga France midfielder Thomas Lemar lakluh an tumna chu an chawlhsan tawh thu a sawi tel bawk.