North Korean club ngamtu Bengaluru

Indian Super League club thar Bengaluru FC-in ISL-ah zuam chi an ni dawn lo tih AFC Cup kaltlangin an pholang - Asia-a club te inelna sang ber dawttuah hian Nilaini zan khan Inter Zone playoff semifinal an khel a, North Korean club ṭha 4.25 SC chu 3-0 in an sawp.

Bengaluru FC tan captain Sunil Chhetri, Udanta Singh leh Lenny Rodrigues ten goal khat ṭheuh an khung a, Inter-zone play-off final (semifinal tlukpui) inpetkai turin Bengaluru dinhmun a ṭha tawh hle.

Mizo tel lohna

Bengaluru boss Albert Ro­ca-a'n 4-3-3 formation hmang­in tlarhmaah Chhetri, Udanta leh Antonio Dovale a inkawp tir a, Bangalore club-in an mualah goal khung an tum tih a chiang. Hetihrual hian starting XI-ah Mizo tan hmun a awm lo a, Zohmingliana Ralte, Malsawmzuala, Lalthuammawia Ralte leh Daniel Lalhlimpuia te chu bench-ah an awm vek.

Zotea Ralte chu tlarhnung laiah Juanan nen inkawp tura ngaih ni mah se Barcelona assistant boss hluiin Rahul Bheke a ring 'rih' zawk a, second half minute 66-naah erawh Zotea tlan luhtir tho niin hun tawp nan minute ruk chauh a awm tawh tihah Daniel-a chu luhtir a ni bawk.

Hmahruaitu Chhetri

Minute 32-naah Udanta Singh chu 4.25 SC penalty area-ah tih tluk a ni a, a pet turin Chhetri a pen chhuak. India cap­tain hian boruak sang karah zam hauh loin 'cool' zetin a khung a, chawlhlawk hman a nihin Bengaluru-in 1-0 in hma an hruai.

Ruah nan hun Sree Kanteerava Stadium-ah North Korean player an che hleithei lo a, penalty hlawh chhuaktu Udanta chuan minute 51-naah chak taka ball a tlan luhpui hnuin Blues goal hnihna a khung. Minute 78-naah Bengaluru-in mawi zeta ball an inpek kual hnuah Chhetri chuan Lenny tan a siam sak a, Goan midfielder tan khung a harsa lo.

Roca a hlim

Bengaluru coach Albert Roca chuan, "Result ṭha tak a ni. Team ṭha tak lakah game hautak em em kan hmachhawn a, khel ṭha viau lo mah ila a hunah tak kan chet ṭhin avangin kan chak a ni," a ti a, a naute khelh danah a lawm thu a sawi.

4.25 SC coach Hwang Yong Song chuan, "Goal chhuah loh tumin Bangalore-ah kan lokal a, draw result tal hlawh chhuak ila a ṭha tur. Ruahsur vanga tui a tam avangin ka defender te an che hleithei lo a, chutihrualin BFC player-te khan tharum an ngah em em si a ni," a ti. Second leg hi September 13-ah North Korea-ah an khel leh ang.