Africa-in World Championship thlen tum dawn

African athletics head Hamad Kalkaba Malboum chuan Afri­can khawmualpui chuan kum 2025 World Championship thlen tuma hmalak an tum thu a sawi, he infiamna khawmpui lian thleng tur hian ram paruk an intel­khawm theih a beisei thu a sawi bawk.

Confederation of African Athletics (CAA) president Kalkaba Malboum chuan, "Kenya, South Africa, Nigeria, Algeria, Egypt leh Morocco te kan be kual tawh a, thu lawmawm tak hlir kan hria," tiin ram paruk an inlungrual tawh thu a sawi.

Kum 2019 leh 2021 World Championship te chu Qatar leh United States ten an thleng dawn tih a chiang tawh a, 2025 World Championship thleng tur hian dil theih mek niin kum 2020-ah thlan fel a ni ang.

Hamad Kalkaba Malboum chuan sawi zawmin, "Mitin mai khan Africa hian FIFA World Cup kan thlen theih an ring ngai lo. Mahse, football inelna lian ber kha hlawhtling takin kan thleng thei a ni, infiamna khawmpui lian dang pawh kan thlen theih lohna chhan tur a awm lo," tiin a sawi.

Khawmualpui dangte nena khaikhin chuan Africa ram ṭhen­khat hi an la re­thei hle a, infiamna khawmpui lian hi anmahni chuan an thleng zo lo. Mahse, an inthlen ṭawm dawn a nih erawh chuan harsa lutuk loa thleng thei mai tura ngaih an ni. Ram ṭhenkhat hi reithei tak ni mah se athlete ropui tak tak nei leh chher chhuak mektu an nih avangin khawvelin a hmelhriat hle thung.