Mayweather v McGregor ; UFC ka khelh chhunzawm zel ang - McGregor

August 26 zan, keini tan Pathianni zing dar 6:30-ah Floyd Mayweather leh Conor McGregor-te boxing ring chhungah an inhmachhawn dawn a, Nilaini zan khan fighter pahnih hian an inhmachhawn hmaa a hnuhnung ber atan media an hmachhawn.

Boxing khawvela sum tamna ber tur nia ngaihah hian fighter pahnih hian dollar maktaduai 100 ve ve an hlawh phak tura ngaih a ni. Hetiang a nih avang hian zawhna tam ber chu "UFC aṭanga lar chhuak McGregor hi a lar chhuahna lamah hian a kir leh duh dawn kher em ni?" tih hi a ni a - "Ka kir leh ang" tih chu Irish fighter chhanna chu a ni.

McGregor chhanna

Kum 29 mi fighter chuan, "Mayweather ka hneh hnuah chuan 'Tunge ka hmachhawn leh ang?' tih hi ka ngaihtuahna luah hmasa tur chu a ni a, ka hmaa chona inchhawp apiang hma­chhawn turin ka pen zel ang," a ti.

Irish fighter chuan sawi chhun­zawmin, "Hnehna ka chan zawha ka tihtur chu UFC leh boxing a tel zel hi a ni. Boxing Lalpa leh MMA Lalpa ka nih hunah chuan keimah ang midang reng an awm lo ang. Chutih hunah chuan min hmachhawn duh an la awm cheu chuan octagon-ah kan inhmachhawn thei ang," a ti a, infiamna pahnihah inhman zel a tum.

Mayweather-a 'cool'

McGregor a inhrosa a, May­weather erawh 'cool' takin a awm thung. American boxer chuan, "McGregor hian a duh apiang a sawi thei. Mahse, a hun a lo thlen hunah theihtawp chhuahin kei chuan ka bei mai ang. Khawvela infiammi zingah hian kei anga rilru huaisen nei hi an awm lo," a ti.

Vawi 49 inhnek a hmachhawna chak vek thei boxer chuan, "Sum duh vang chauh a ni lo a, he kan inhmachhawn tur hi ka ngai thutak hle a ni," tiin a hmachhawn tur McGregor chu boxer ni lo mah se a ngaihnep ngawt loh thu a sawi. Hetihlai hian Mayweather-a pa Floyd Sr chuan a fapa chu kum hnih ngawt inhnek tawh lo a nih avangin tun hma ang a nih tawh loh thu a lo sawi ve bawk.

The Money Belt

Fighter pahnih inhmachhawn turin title inchuh nei lo mah se a chak zawk chuan World Boxing Council aṭangin 'The Money Belt' tih chu an dawng ang. He belt hi lunghlu 3,360, saphire 600, emerald 300 leh rangkachak 1.5 kg hmanga chei a ni a, a belt hi awle vun aṭanga siam a ni.

Las Vegas khawpuia inhnekah hian dollar maktaduai 600 sum hmuhchhuah beisei a ni a, kum 2015-a Mayweather-a'n Manny Pacquiao a hneh ṭuma maktaduai 4.6-in pay-per-view kaltlanga an en kha khum tura ngaih niin khawvel ram 220-ah television kaltlanga chhuah tur a ni bawk.

Dana beiseina

McGregor-a'n khawvel rin a hlawh lo a, sum a hmuh hnem dawn avangin UFC a bansan ringtu an tam hle bawk. UFC president Dana White chuan, "A chungah engpawh thleng se ka lawmpui a ni," a ti a, "Mayweather a hneh hnuah chuan he infiamna huang chhunga star lian ber a ni bawk ang," tiin a sawi nghal bawk.

UFC president chuan boxing promoter lar Bob Arum-a'n, "LeBron James hian Anhony Joshua cho se, chutiang chu a ni," tia Las Vegas in fight tur a sawisel chu chhang nghalin, "McGregor hi fighter a ni a, Floyd a hneh hunah chuan vawiina thil lo sawi lawk tute hian zawhna dang an nei leh tawh ang," tiin a nau chu a ring hle.

Enna tur

"Khawiah nge fighter pahnih inhmachhawn tur hi kan en theih ang?" tih chu zawhna tam ber zinga mi a ni a, India ramah chuan TV lama an pekchhuahna tur a la chiang thei lo. A tir lamah Sony Pictures Network nen inbiakna awm mah se engmah tihchian a la ni lo a, chiang vat tura beisei a ni.

Internet lamah erawh VEQTA chuan India ramah an pe chhuak dawn a, VEQTA hotupa Gaurav Gill chuan, "VEQTA.in-ah live streaming hmangin en theih turin kan pe chhuak dawn a, VEQTA Android leh IOS Apps hmangin a en theih bawk ang," tiin fighter pahnih inhmachhawn tur an pekchhuah dan tur chungchang a sawi a, en tur hian annual subscription fee Rs. 99 chawi a ngai thung ang.