World Championship last 16-ah Saina, Sai Praneeth leh Srikanth
World Badminton Championship khelh mekah Indian shuttler Saina Nehwal, Sai Praneeth leh Kidambi Srikanth te chuan last 16 an inhlang kai vek. Mipa singles lamah player langsar Lin Dan chuan harsa takin hnehna a chang hram bawk.
Nilaini zan Glasgow-a inkhelah Olympic bronze medalist Saina hian Sabrina Jaquet chu minute 33 chungin 21-11, 21-12 in a hneh. World number 1 hlui Saina hian Sung Ji Hyun a hmachhawn leh nghal ang, seeded pahnihna Ji Hyun hian Tanvi Lad chu 21-9, 21-19 in a hneh ve bawk a ni.
Seeded 12-na Saina chuan, "Inkhel hriatthiam har tak a ni, ka khingpui kha a fimkhurin a vaw thei hle a, chesual palh thei dinhmunah ka ding. Tournament tir lamah hi chuan inkhelh hi a harsa ṭhin a, hnehna kan chang laklawh a nih chuan thui tak a thlen theih thung," tiin a sawi.
Mipa singles lamah Srikanth chuan Lucas Corvee lakah 21-9, 21-17 in hnehna a chang a, nizan khan seeded 14-na Anders Antonsen nen inhmachhawn zui lehin he thu buatsaih lai hian result kan hre hman lo.
Inkhel dangah Singapore Open champion B Sai Praneeth chuan inkhel inhnehtawk takah world number 26 Anthony Sinisuka Ginting nen darkar khat leh minute 12 chhung zet an inkhelh hnuah 14-21, 21-18, 21-19 in hnehna a chang hram.
India tlangval dang Ajay Jayaram-a'n Mark Caljouw chu 21-13, 21-18 in a hneh a, inkhel dangah Sameer Vermaerawh 20-22, 9-21 in Indian thisen kai English mi Rajiv Ouseph lakah a chak lo thung.
Chinese legend Lin Dan-a'n a vawi ruk nana World Championship nomawi chawi a tumna kawngah fiahna hautak a paltlang. Kum 33 mi Lin Dan hian Emil Holst lakah game hmasa ber a hloh hnuin 19-21, 21-8, 21-16 in hnehna a chang hram a, chak ni hmel hmu tur hian darkar khat leh minute 21 zet hun a mamawh.
Champion lai Chen Long-a'n last 16 lut turin harsatna a nei lo, Olympic champion lai ni bawk Chen hian Indonesia star Sony Dwi Kuncoro chu 21-3, 21-9 in a hneh a, seeded pakhatna Son Won Ho pawhin harsa lo takin Gergely Krausz 21-13, 21-9 in a hneh ve bawk.