Rooney-a'n thutlukna a siam fel ; England kawr hak a tum tawh lo

England manager Gareth Southgate chuan ram tana khel leh turin Wayne Rooney a ko a, Everton striker hian kir zai a rel tawh lo. August 23 zan khan England kawr ha tawh zinga goal khung tam ber Rooney-a'n ram tana inkhelh a chawlhsan thu a puang zui bawk.

Ram tana khel châk

England-in November 11, 2016 khan Scotland 3-0 in an hneh a, goal thumna hi Gary Cahill-a khung niin Rooney siam sak a ni. Hemi hnu hian Jose Mourinho hnuaia khelhna hmun chang ṭha lo Rooney hi ram tana khel turin koh a ni tawh lo.

English striker hian inkhelh duhin July thla khan Manchester United chhuahsanin a chawr chhuahna Everton a pan a, hemi ṭum hian Rooney chuan, "Gareth hian kar tina khelhna hun ka chan theih chuan ka tan kawngka hawn sak min tiam a, ka tan chuan thu lawmawm tak a ni. Everton-ah hian ka chet

ṭhat ngei ka beisei a, Gareth hian ngaihtuahna pawh a sen ve ngei a ṭul ang," tiin ram tana khelh a châk thu a sawi.

Rooney hian a career tihtawp nan Everton hi a pan lo a, season ṭha tak a neih theih nan a chawlh hun pawt tawiin training a nei hma. Kum 31 mi striker hian Toffees tan league match hmasa pahnihah goal khat ve ve a khung a, Stoke City an hneh theihna chhan leh Manchester City an draw theihna chhan a ni.

An ko ta, mahse

England hian September 1 zan hian World Cup Qualifier-ah Malta an tlawh dawn a, September 4 zanah Slovakia an mikhual leh dawn. Three Lions hi Group F-ah awmin match ruk khelh tawh aṭangin point 14 an hmu a, group hmahruaitu an ni.

English striker Rooney chuan, "Tun kar khan Gareth Southgate nen kan inbia a, England squad-a kir leh turin min duh a, thu lawmawm a ni. Amaherawhchu hun rei tak ka lo inngaihtuah tawh a, ram tana khelh ka chawlhsan tur thu ka lo hrilh," tiin England kawr hak a tum tawh loh thu a sawi.

Manchester United striker hlui Rooney chuan, "Thutlukna harsa tak a nih avangin ka chhung­te, Everton-a kan ma­nager leh ka lam hnai te ngaihdan ka la hmasa. England tana khelh hi ka tan engtiklai pawhin a hlu a, player a ni emaw captain turin emaw pawh ni se a danglam lo. Tun dinhmun ka thlen theihna atana min puitu zawng zawng chungah lawmthu ka sawi a, tunah chuan chawlh a hun ta a ni," tiin a sawi.

Everton hmangaihtu Rooney chuan, "Manchester United chhuahsan tura thutlukna siam kha a harsa a, amaherawhchu Everton haw hi thutlukna dik tih ka hria. Tunah chuan he club hlawhtlinna tur hian ka theihna zawng zawng ka seng tawh ang," tiin a seilianna club tana inpumpek a tum thu a sawi.

Thutlukna awmze nei

Football inelnaa ngaihhlut ber FIFA World Cup chu nak­kum hian Russia-ah khelh a ni dawn a, Rooney thutlukna siam kawngah pawh he inelna hian nghawng a nei ang. Amah­erawhchu English striker hian a dinhmun a hrechiang a, duh a nih laia taka a chawlh avang hian a ropuina a belhchhah ang.

Kum 1966 hnua England tana khel player zawng zawngin World Cup-ah beisei an pha lo vek a, Rooney pawh a bang bik lo. English striker hian October thla hian kum 32 a tling dawn a, tharum hmang tam striker hi a tha a ṭhum ve ṭan avangin Gareth Southgate a kohna hi chhang pawh ni se khelhna hmun a chang pha ang em tih hi zawhna awm a ni.

England hmatawnga rinrawl tur chu Harry Kane a ni a, Tottenham striker hnunga no. 10 role chelh tur pawhin Dele Alli nekchhuah a har ang. Tunah hian Adam Lallana a inhliam a, Liverpool midfielder dam hunah Rooney dinhmun a derthawng zui thei bawk.

Hei vang hian Rooney tan tuna chawlh hi a finthlak a, amaherawhchu tuna a thutlukna avang hian ram tana khel tam ber nihna hun ṭha erawh a chan ang. Eng pawh chu nise Rooney hi England tana goal khung tam ber leh outfield player zinga khel tam ber a ni a, England-a thuneitu sang ber Football Association hnen aṭangin chawimawina pek hi a phu a, a nupui fanaute hruaiin Wembley Stadium-ah an la chawimawi ang.