Roger Federer chunga Rinna nghattu McEnroe
US Open chu August 28, Thawhṭanni aṭangin khelh ṭan a ni tawh dawn a, a vanglaia world number 1 pawh ni tawh McEnroe chuan Roger Federer chu nomawi chawi tura rinkai a la nih phak thu a sawi.
Tun dinhmunah Federer hi hliam tenau vangin a chawl mek a, hard court inelna lianah hi chuan inlan thei ngei tura beisei a ni. Grand Slam vawi 12 champion tawh Novak Djokovic leh champion lai Stan Wawrinka te erawh hliam vangin an inlan thei dawn lo tih a chiang tawh.
Grand Slam noimawi pakua zet vaw chhuaktu McEnroe chuan, "Roger hian nomawi a chawi thei a nih chuan tun hnai kum 50 chhunga US Open chanchin danglam leh ropui ber a ni ang. Ani nen hian tun hnaiah kan inhmu a, zahna chibai ka buk. Tennis ka en ve tawh chinah chuan ani anga player ropui hi ka la hmu lo," tiin a sawi.
Grand Slam vawi 19 champion tawh Federer hian kumin bikah Australian Open leh Wimbledon title a la a, clay court inelna lian French Open-ah erawh a inlan lo thung.
US Open nomawi vawi li chawi thei McEnroe chuan sawi zawmin, "Hliam a neih hnua a rawn kir leh thei hi a ropui a, tun hnaia a khelh chhoh dan hi chu a hma zawng ai khan a ṭha zawk emaw tih mai tur a ni, tun ṭumah pawh hian champion tura rinkai ber pakhat a ni," a ti.
Kumin US Open-ah hian mipa leh hmeichhe singles champion chuan $3,700,000 (Rs 23,70,22,000) an dawng dawn a, tennis inelna huanga lawmman a tam ber ṭum a ni dawn.