Pakhatna nih tum Hamilton

Formula 1 nipui chawlh hun a zo a, inelna neih chhunzawm a ni leh tawh dawn. Pathianni tlai dar 5:30 hian Belgian Grand Prix tlan a ni leh ang. Mercedes driver Lewis Hamilton-a'n pakhatna nih tuma thapui a thawh nghal tur thu a sawi.

Season laihawl chawlh an hman hmaa an tlan hnuhnun ber Hungary GP-ah khan Sebastian Vettel chu pakhatna niin point 202 a hmu a, championship-ah amah hnaih bertu Hamilton aiin point 14-in hma a hruai fal a, intlansiak 11 awm tawh aṭanga vawi li ve ve hnehna chang tawh driver pahnih hi an la inel chhunzawm dawn tih a chiang.

World champion vawi thum ni tawh Hamilton chuan, "Inelnaah chuan a umtu zawka ṭan ngaih chang a awm a, chutiang dinhmuna kan ding a nih chuan inthlahdah thei kan ni lo. Tunah hian pahnihna ka ni mek a, ka hma a awm umphak tur chuan thapui ka thawh a ngai, ka umphak ngei pawh ka beisei," tiin Vettel lehpelh theih a inbeisei hle.

Britain tlangval Hamilton hi Formula 1 champion vawi thum a ni tawh a, tun laia a elpui ber Vettel hi vawi li a champion tawh thung. Hamilton hian season tawpah nomawi a chawi thei a nih chuan German driver record a nih rual dawn a, a hneh lo a nih erawh chuan driver inel tak pahnihte hi an inthlauhna a zau sawt dawn thung.

Hamilton hian tun kar tawp hian Formula 1 Grand Prix 200-na a tlan dawn a, pole position a chang a nih chuan German legend Michael Schumacher-a record vawi 68 chu a nih rual chiah ang.