Becker-a tan hna thar

Wimbledon champion vawi thum ni tawh Boris Becker chu Germany mipa tennis thuneitu sang (head of men's tennis in Ger­many) atan ruat thar a ni.

Kum 49 mi Becker hian 1985 -1996 inkar khan Grand Slam nomawi paruk a chawi a, tennis khelh a chawlhsan hnuah pawh coaching lamah a kal chhunzawm a, hnuhma ṭha a hnutchhiah chho zel.

Ram leh ram mipa team inelna Davis Cup-ah pawh kum 1997 - 1999 khan an ram Germany coach a lo ni tawh a, kum 2013 - 2016 chhung khan Novak Djokovic-a coah ni lehin Serbian tlangvalin Grand Slam nomawi 12 a chawi tawh zinga a zatve chu Becker-a kaihhruaina hnuaia a vuak chhuah a ni.

Becker chuan,"Tennis hi ka nun nen a inzawm nghet tlat a, player ka nih laia ka sulhnu aiin coach ka nih hnua ka hna­thawh hi sawi nuam ka ti zawk fo. Tunah dinhmun pawi­mawh tak ka chelh leh dawn a, kan ram hian mipa player ṭha kan chher chhuah zel ka beisei," tiin a sawi.