US Open champion chu Iga Swiatek

World number 1 ni chungin New York khawpui a pan a, United States aṭanga Iga Swiatek a haw leh dawn meuh chuan US Open nomawi nen a ni ta - a sulhnu hnutchhiah hi engtikah mah theihnghilh a ni tawh ngai lo ang.

Polish nula hian a vawi khat nan US Open nomawi a chawi a, season kal laia Grand Slam title pahnih a lakna a nih bakah, tennis a khelh hun chhunga major title pathum a lak tlinna a ni bawk; nomawi chawi tur hian Ons Jabeur chu 6-2, 7-6(5) in a hneh.

Kuminah French Open nomawi a chawi tawh a, tuna US Open champion a nih leh avang hian, world number 1 hlui Angelique Kerber (2016) hnuah hmeichhe player zinga season khata Grand Slam pakhat aia tam la leh thei hmasa ber a ni.

A ṭha ber chu
Kumin March thla khan Ashleigh Barty chuan tennis a chawlhsan thut a, world number 1 a chawlh tak avang hian kha tih laia number 2 Swiatek chu a chung berah a lawn kai a, hnunglam hawi tawh loin hma lam a pan ngar ngar.

Season tir lamah khan a zawnin match 37 chak te a nei hial, hetih hun chhung hian nomawi paruk a chawi hman. Wimbledon-ah erawh last 16 a pel lo a, tun inelna neih zawh takah pawh hian bul a ṭan fuh tawk lo, a tawpah erawh chungnung ber a ni ta tho.

Final bika a hmachhawn Jabeur nen hian May thla khan Rome khawpuiah an inhmachhawn a, an inkhelh hnuhnung hian game li chiah a hloh. Arthur Ashe Stadium-ah pawh a tir aṭangin inkhel a thunun a, set hnihna harsa ve deuh mah se buaina tham a tling lo.

Darkar khat leh minute 51 chhunga hnehna changtu Swiatek chuan, "Thu tawi fel taka sawifiah thiam a harsa ka ti hle, a tir lamah 3-0 ngawtin hma hruai mah ila Jabeur kha a beidawng duh lo a, na takin min um reng mai a ni," a ti.

Champion chungchang sawi zuiin Swiatek chuan, "Hard court hi ka tan chuan hmun nuam tak a ni ngai lo. A bik takin US Open-ah phei chuan ball kal hi a rang êm êm a, inkhelh harsa ka ti ṭhin. Kumin erawh ka tan khum ṭha a ni," a ti a, a tan thil thar a nih thu a sawi bawk.

Vanduaina leh Jabeur
Tunisian nula Jabeur hi an ram aiawhtu mai a ni lo, an khawmualpui Africa aiawhtu a ni kan ti tawh ṭhin. African hmeichhe player zingah Wimbledon leh US Open final lut thei hmasa ber a ni a, nomawi erawh a la hlawh chhuak thei rih lo.

US Open final khelh hma khan, seeded pangana Jabeur hian Wimbledon final-a Elena Rybakina a hneh loh aṭang khan zirlai tam tak a zir chhuah thu a sawi a, a vawi khat nan Grand Slam champion nih theih ngei a beisei hle.

Mahse, set hmasa berah a service hmasa zinga 48% chauh a chak a, service ber a ṭhat tawk loh chuan a hnu lam a harsa tawh ṭhin. Inkhel pumpuiah a service vawi nga a hloh a, champion turin kawng dik a zawh tawk lo tih a lang.

Kum 28 mi Jabeur chuan, "A tir aṭang khan min nawr na êm êm a, ka tan chuan tih theih dang a awm tawh lo. Inkhel boruak a san zawh poh leh Iga-i kha a khel ṭha tual tual a, ka tih theih zawng zawng ti ve mah ila hnehna chan nan a tawk zo lo," a ti.

Serena Williams (2014) tih lohah chuan, hmeichhe player zingah Swiatek hi season khata nomawi pasarih chawi leh thei hmasa a ni. Season a hman ṭhat em avangin a hmaa ding an ṭang zo ngai lo, season tawp hmain title dang a lak belh leh pawh a rinawm.

Mipa Final = Nomawi + Number 1
Nizan zanlai khan US Open mipa singles final khelh a ni a, seeded pathumna Carlos Alcaraz leh seeded pangana Casper Ruud te chuan Grand Slam nomawi hmasa ber bakah, world number 1 nihna an inchuh nghal.
Player pahnih hian tun hmain major title an la hlawh chhuak ngai lo, pakhat zawk chuan a dawng dawn. US Open champion lai leh world number 1 ni bawk Daniil Medvedev a tlak hma avangin number 1 nih theihna kawng a inhawng bawk a ni.

Roger Federer, Rafael Nadal leh Novak Djokovic ten hun rei tak chhung tennis inelna an thunun a, an hun a liam ve mek. US Open-ah hian Federer leh Novak an inlan lo, Nadal inlan mah se a thleng sang lo bawk.