Tlai dar 3-ah Chawnpui vs Venghnuai

Zote Honda Mizoram Premier League Season 9-ah coach Lalsangzuala Hmar enkawl Chawnpui FC-in point an la hmu lo a, coach Lalrindika Hmar enkawl FC Venhnuaiin chak hmel an hmu lo. Vawiin tlai dar 3:00 hian RG Stadium-ah Chawnpui leh Venghnuai an inkhel ang.

Chawnpui hian match hmasa berah I League club Aizawl FC an hmachhawn a, ṭum hnih ngawt hmahruai mah se 4-2 in an chak lo. Sanga hian Aizawl FC laka an chetsual ṭumin an tihsual a hmu thiam a, second half-ah a siam ṭha.

Sanga hian a fapa keeper Simon Lalṭhazuala Hmar (U18) la chhuakin BVT tlangval Lallawmzuala a dah lut a, attacking lamah player taima zawk Lalsawmzela leh Lalrinfela (U18) te a dah lut bawk.

Chawnpui hian tlarhmaah tawnhriat nei Lalliansanga (Notea) leh MC Malsawmzuala te an nei a, training la ngah lo mah se match hmasa berah bul an ṭan ve ve avangin Venghnuai an hmachhawn hunah an hriam sawt ang.

FC Venghnuaiin match hmasa berah Bethlehem lakah 3-1 a hma an hruai hnuin 3-3 in an inhnehtawk a, chak lo thei dinhmunah an ding hial. Coach Rindika Hmar chuan, "Hahdam taka boruak kan hip lai hian, kan hahdam leh lutuk a, kan boruak hipte kan ngaihsak loh chuan kan thaw a chham ṭhin. Chu chu a ni, kan nihna chu. A aia ṭhain aw," tiin whatsApp status-ah a ziak a, insiamṭhat ngei an tum.

I Day Football-ah Venghnuai hian semifinal an thleng a, MPL-ah hian a sang pali zinga tel tur chuan insiamṭhat lehzual a pawimawh - Bethlehem laka an khelh dan thlir chuan semifinal khelh phak an harsat ang.

Venghnuaiin talent nei ṭha Vanlalthanga an kawl a, Hualngohmun midfielder hian match hmasa berah freekick aṭangin a khung. Thanga thlawp tur hian I Day Football best forward Lalrammuanpuia (Apuia) a awm a, an player thar C. Ramdinmawia pawh mamawh huna chhawr theih turin squad-ah a awm a rinawm bawk.