A hun a thleng : Chanmari vs Chhinga Veng
Zote Honda Mizoram Premier League Season 9-ah Chanmari FC leh Chhinga Veng FC te vawiin chhun dar 12:00 hian RG Stadium-ah an inkhel dawn a, inkhel en châkawm a ni.
Chanmari hi MPL vawi hnih champion tawh an ni a, Chhinga Veng hi MPL6 khan an champion ve bawk. Team pahnih hian champion thuruk an hre ve ve a, khelmual chhung ang thoin khelmual pawn pawimawhzia an hria - hei tak hi vawiin inkhel en châkawm chhan chu a ni.
Boruak 'Hot' chu
I Day Football-ah team pahnih hi an inkhel tawh a, an inhmachhawn hma hian khelmual pawnah chanchin ngaihnawm a awm. Chhinga Veng hian Chanmari biak fel vek tawh Lalengzama Vangchhia chu an chhuhsak.
Lunglei tlangval Zam Zama hi AIFF Elite Academy chhuak a ni a, Bengaluru reserve bakah I League club Churchill Brothers tan a khel tawh. A thuphungin Zam Zama hian Chanmari nen inremna an nei tawh a, mah se ziaka dah a la nih loh avangin Chhingcows-in Ngaizelah inremna an ziahpui.
Hei chauh hi a ni lo, Chhinga Veng leh Chanmari te hi Serchhip striker Lalrinzuala pawh an lo inchuh viau tawh. Chhinga Veng hian Rinzuala hi an chang ta zawk.
Chanmari hi an awm mai bik bik lo tih erawh hriat tel a ṭha, Chhinga Vengin an 'patta' sa tawha an ngaih F. Lalnuntluanga leh Lalremruata te chu Chanmarians hian an thlem chhuahsak ve bawk.
Chanmariin Electric Veng an hneh ṭumin Tluangtea hian chakna goal a khung a, Remruata hi man of the match a thlan a ni bawk. Chutiang bawkin Rinzuala leh Zam Zama te hian Chhingcows tan hmun pawimawh an chang ang.
Khelmual chhunglam
I Day Football-a an intawn hmasak ṭumin Serchhip tlangval an langsar a, Chhinga Veng 3-0 in an chak. Rinzuala'n goal hnih a khung a, midfielder Johny Lalremruata'n a khung bawk.
An intawn hnuhnun ber aiin team pahnih hi an ṭha tawh zawk ve ve a, tu nge ṭha zawk tih erawh hriatthiam a har. Chanmari coach Rochhingpuia hian MPL match hmasa berah hnehna a chang nghal a, chutihrualin coach a nihna angin tawnhriat a la ngah tawk lo.
Chhingcows team enkawltu Anand Gurung leh Lalremruata te erawhin tawnhriat an nei ṭha tawh a, hei hi vawiin lamah danglamna a ni thei.
Player thlir erawh chuan Chanmariin tawnhriat nei player an ngah zawk. Lalramchullova, Malsawmzuala, H. Lalmuankima, Joseph Lalnunpuia leh MS Dawngliana te hi tawnhriat nei ṭha vek an ni a, match hmasa berah Chullova an dah ṭha hial.
Chhinga Vengin MPL-ah mi thar an kawl hnem thung a, chutihrualin an game puitlinzia erawh Mizoram Police lakah a lang. Chhingcows hian chak hmel an la hmu lo a, Chanmari lakah point thum hmuh an tum ang.
Fixtures & Results
Round 1
September 8, Ningani
Chawnpui FC 2- 4 Aizawl FC
CHFC : David Lalrinmuana 5'; MC Malsawmzuala 17' (P)
AFC : Lalbiakzuala 6'; Jakob Vanlalhlimpuia 34'; Jeremy Laldinpuia 38'; David Lalhlansanga 70'
MoM : Lalbiakzuala, AFC
Chhinga Veng 0- 0 Mizoram Police
MoM : H. Lalbiakthanga, Mizoram Police
September 9, Zirtawpni
FC Venghnuai 3 - 3 FC Bethlehem
FCV : Vanlalthanga 41'; H. Lalrempuia 45+2'; Lalrammuanpuia 56'
FCB : Lalbiakdika 4'; Lalruatpuia 71'; Moses Lalrinzuala 73'
MoM : Sena Ralte, FC Bethlehem
Chanmari FC 1 - 0 Electric Veng FC
CFC : F. Lalnuntluanga 66' (P)
MoM : Lalremruata (J. No. 17), Chanmari FC
ROUND 2 - RG Stadium
September 12, Thawhṭanni
Chanmari FC 12:00 PM Chhinga Veng FC
Chawnpui FC 3:00 PM FC Venghnuai
September 13, Thawhlehni
Mizoram Police FC 12:00 PM Electric Veng FC
FC Bethlehem 3:00 PM Aizawl FC