Mixed Martial Arts legend Nate Diaz chuan a UFC contrract-a a fight hnuhnung ber chu nimin khan a hmachhawn a, amah ang thoa fighter hriat hlawh Tony Ferguson chu round linaah submission (guillotine choke) hmangin a hneh. 
Kum 37 mi Nate Diaz-a'n MMA-a fight vawi 34 a hmachhawna vawi 21 hnehna a channa chiah a ni a, vawi 13 a tlawm tawh - a fight hnuhnung pahniha a tlawm hnua hnehna hlado chham chunga UFC a mangṭha tur hi a lawm khawp ang.
Hetihlai hian kum 38 mi Tony tan pawh a chuai ve ṭan ta tih pawm a hun - fight a hmachhawn hnuhnung pangaah a tlawm vek a, hemi hma hian match thumah chiah tlawm a nei. Tunah erawh fight 33 nei tawhin, vawi 25 a chak a, vawi riat a tlawm. 
Aiawhtu Ruahmanna hmasaah chuan Nate Diaz hi Swede fighter rothap Khamzat Chimaev nena inhmachhawn tur an ni a, mahse, Zirtawpnia inbukna neih a nihin, Chimaev hi welterweight khel turin a buk a rit hret!

Welterweight-ah hian 77.5 kilogram aia rih a rem a, mahse, Chimaev hian kg 80 zet a kai - hetihlai hian Nate Diaz erawh 77kg a ni thung a, Diaz-a hmachhawn tur hian Tony hi pawh pen zui a ni. 
Hetiang a nih avang hian Chimaev pawhin fighter inbuk tling lo an awm a, an fight-na tur weight an siam chawp ṭhin, catchweight-ah Kevin Holland a hmachhawn ta zawk a, first round lekah submission hmangin hnehna a chang. 
Hei le Diaz
T-Mobile Arena-a fight hmuhnawm takah fighter pahnihin chak an tum a, American fighter Diaz hian vawi tam tak hnek chhuakin Tony Ferguson-a'n a khan lo hle - mahse, Ferguson hian chuti maia tlawm erawh a tum bik lo. 

Diaz ang thoa American fighter Ferguson hian boxing-ah chuan a khingpui hi a ngam lo zawk tih a hai lo a, a ke lam a bitum ve thung - mahse, round linaah Ferguson a chesual zui. 
Ferguson hian inhneka a hneh loh Diaz hi 'takedown' a tum a, mahse, fighter thiam bik Diaz chuan hei hi remchangah lo lain, a lo kuah bet chat a, Ferguson a tal chhuak leh tawh lo - Diaz a chak.
Lawm takin Nate Diaz-a'n UFC-a a contract a hmang zo a, UFC-ah inlan zui tum lo mah se combat sports erawh chawlhsan mai a la tum lo. Diaz chuan, "Kei leh UFC inkara thil thleng kha chu hmangaihna leh huatna inpawlh a ni ber. 

"Hnehna ka chang leh ta. UFC hi ka hmangaih a, UFC president Dana White hian fak a phu. UFC-a career rei ber leh hlawhtling ber ka hmang ang hialin ka inngai a ni. 
"UFC chhuahsan a, fighter dangte hnena infiamna huang danga rorel dan hmuhtir ka duh. Boxing, kickboxing, jiu jitsu te u, kei hi a ṭha ber chu ka ni a, in tan ka lokal dawn e," a ti a, kum 37 ni tawh mah se fight chawlhsan mai turmna a la nei lo. 
Chimaev a chak Nate Diaz ber hmachhawn thei lo mah se Chimaev-a'n round khatna lekah Holland a hneh a, MMA-a fight vawi 12 a hmachhawna a vawi 12 chakna a ni - kum 28 mi lek a la ni bawk a, a chanchin hi kan la hre dawn chauh niin a lang. 

Chimaev chuan, "Weight tling ngei tur ka ni a, mahse, doctor-te thurawn angin ka ti a, tui in tam turin min hrilh," a ti a, a doctor-te thurawn anga a kal avanga welterweight-a inlan thei ta lo a nih thu a sawi. 
Russia-a piang, Swede mi fighter chuan, "Diaz hmachhawn tur ka ni a, cage chhungah chuan tuman min dang thei ngai lo - cage chhuahsan ka tum lo a, hei hi ka in chu a ni," a ti - hetihlai hian Holland hmachhawn tura ruahman hmasak Daniel Rodriguez chuan Ferguson nena in fight tura tih Li Jingliang chu split decision hmangin a hneh.