PSG tan Neymar a vul zel

Brazil forward Neymar-a goal khat hmangin Paris St-Germain chuan Brest 1-0 in an hneh. Ligue 1 champion lai hian match sarih aṭanga point 19 hmuin hmahruaitu an ni zel - pahnihna Marseille nen an point a inzat.

Kum 30 mi Neymar hian Lionel Messi ball pek a khung, Argentina captain Messi hian hla taka awm Neymar lak theih turin a hma a player intlar a pet kul khum a; Barcelona tana a khelhpui tawh ṭhin hian lo la thlain goal awmchhun khung nan a hmang.

Point thum hmu turin PSG hian vanneihna an mamawh ve tho. Brest tana Islam Slimani-a penalty chhuih chu goalkeeper Gianluigi Donnarumma chuan a lo dansak hlauh a, hneh loh nei loin Paris club an kaltluang zel.

Neymar-a'n PSG tan goal 110 a khung tling ta a, club tana goal khung hnem lamah palina a ni. Neymar chungah hian Zlatan Ibrahimovic (156 goals) leh Kylian Mbappe (180) te bakah Edinson Cavani (301) te an awm.

Christophe Galtier-a'n hun tawp dawn lamah a player ṭha Neymar leh Mbappe te a la chhuak, tun karah Champions League an khelh leh dawn vang a ni. PSG hian Nilaini zan hian UCL group stage khel turin Maccabi Haifa an lenchilh ang.