Van der Sar-a'n contract a pawtsei

Ajax CEO Edwin van der Sar-a'n June 2025 thleng atan a contract neihlai chu a pawtsei a, Dutch club-in tun hnaia hma a sawnna kawngah Manchester United goalkeeper hi a pawimawh hle.

Ajax chuan, "Supervisory Board of AFC Ajax chuan Edwin van der Sar contract neihlai chu June 30, 2025 thleng a pawtsei a ni," tiin thuchhuah an siam.

Van der Sar chuan, "Tun hnai kum 10 chhungin Ajax tan thil tam tak a thleng a, khawvelin min hriat chhan ber chu first team result ṭhat vang a ni. Chutihrualin result phenah hian club inrelbawlna fel fai tak a awm," tiin a sawi.

Tun nipui bazarah Ajax-in Antony, Lisandro Martínez, Sebastien Haller, Ryan Gravenberch leh player ṭha dang an hralh a, transfer aṭangin euro maktaduai 210 bawr vel an lalut. Heti chung hian Eredivisie-ah season bul an ṭan ṭha a, match rukah vawi ruk chak tawhin champion nawn turin an dinhmun a ṭha hle.