Buaina karah Barca an chak

Cadiz khelmualah Barcelona-in 4-0 ngawtin hnehna an chang a, he inkhelah hian Cadiz fans zinga pakhat chu lung lam harsatna avangin a talbuai a, minute 50 zet chu inkhel tihtawp a ngaih phah hial - a nunna chhanhim a ni.

Barcelona tan nipui transfer-a Manchester United pan duh lotu Frenkie de Jong chuan goal hmahruai a khung a, bench aṭanga lut Robert Lewandowski, Ansu Fati leh Ousmane Dembele te chuan goal khat ṭheuh an khung bawk.

Catalan club hian league match nga an khelhah tlawm la nei loin table chung ber an luah mek a, nizana Real Madrid result a zirin an dinhmun erawh he thuziak i chhiar meuh chuan a danglam leh tawh ang.

A hming Lewy
Barca-in first half chhungin goal an khung lo a, second half-ah an insiamṭha - De Jong-a'n minute 55-naa goal hmahruai a khung hnuah, Lewandowski chuan a belhchhah ve leh a, Bayern Munich aṭanga Barca pantu hian league tharah insiamrem turin hun a mamawh lo.

Kum 34 mi striker hian Barca tan match ruk a khelh aṭangin goal kua a khung tling leh der tawh a, a tlangnel hma hle - mahse, hun tawp nan minute 10 chiah a awm tihah Cadiz fan a talbuai a, inkhel tihtawp lailawk a ni.

Cadiz goalkeeper Jeremias Ledesma chuan rang takin defibrillator a la a, khelmualah tlan let nghal vatin, fan awmna lamah hian a vawm chho - ambulance hmangin he fan hi damdawi inah hruai zui a ni a, tunah chuan a ṭha tawh.

Football aiah nunna
Barca boss Xavi chuan, "Kan vai khan inkhel tihtawp kan remti vek a, mihring nunna chang thu sawi kan ni a, football ai chuan hei hi a pawimawh zawk a ni. Vanneithlak takin an chhan thei hlauh e," tiin a sawi.

Minute 50 zet inkhel tihtawp a nih hnuah player-te chu khelmualah an lut leh a, minute 10 la bang chu an khel chhunzawm - minute tam lo tak angin a lang a, Barca erawhin goal hnih an khung belh.

Ansu Fati chuan minute 86-naah an goal thumna hi a khung a, Dembele chuan hun pek belhah chak nemnghehna goal a khung bawk - Barca an chak a, an hun tawn danglam tak avangin an chak hi an hre reng tawh ang.

Goal a sur
La Liga club inkhel ngaihven hlawh dangah Atletico Madrid chuan team ṭha Celta Vigo chu 4-1 ngawtin an sawp a, an league match hnuhnung bera Real Sociedad an inhnehtawkpui hnuin, Madrid khaw club hian hnehna hlado an chham ve leh ta.

Atletico tan Angel Correa, Rodrigo de Paul leh Yannick Carrasco ten goal an khung hnuah Gabri Veiga chuan Celta tan minute 71-naah si phurh a sut ṭhen a, mahse, minute 82-naah Matheus Cunha-a cross chu Celta centre back Unai Nunez chuan an lamah a ti lut a, 4-1 in an tlawm.

Madrid khaw club tan hian Antoine Griezmann chu minute 63-naah luhtir a ni. French forward hi an match khelh hmasak pangaa minute 62, 62, 64, 63 leh 61-naah te luhtir a lo ni tawh bawk.

September 09, Zirtawpni Zan
Girona 2 - 1 Real Valladolid
GIR: Reinier Jesus 21'; Oriol Romeu 88'
REV: Monchu 38'
September 10, Inrinni Zan
Rayo Vallecano 2 - 1 Valencia
RAY: Isi Palazón 5'; Nico González 52' (OG)
VAL: Mouctar Diakhaby 90+3'
Espanyol 2 - 3 Sevilla
ESP: Joselu 45' (P); Martin Braithwaite 62'
SEV: Erik Lamela 1'; 26' José Ángel Carmona 26', 45'
Cadiz 0 - 4 Barcelona
BAR: Frenkie de Jong 55'; Robert Lewandowski 65'; Ansu Fati 86'; Ousmane Dembele 90+2'
Atletico Madrid 4 - 1 Celta Vigo
ATM: Angel Correa 9'; Rodrigo de Paul 50'; Yannick Carrasco 66'; Unai Nunez 82' (OG)
CEL: Gabri Veiga 71'