Stuttgart-in Bayern an chelh

Bayern Munich-in Champions League-ah Italian club lian Inter Milan hneh mah se Bundesliga lamah an che fuh thei lo. Inrinni zan khan Bavarians hi an mualah Stuttgart nen 2-2 in an inhnehtawk a, league match hnuhnung pathumah an inhnehtawk vek.

Allianz Arena-a inkhelah hian Bayern rawlthar duhawm Mathys Tel chuan Alphonso Davies siamsak chu minute 36-naah a khung. Tel hi kum 17 mi chauh a ni a, Bayern tana goal khung naupang ber a ni.

Minute 57-naah Chris Fuhrich hmangin Stuttgart-in siphurh an sut a, Fuhrich finishing ṭha mah se Bayern tlarhnung a phui lo - season liam ta aṭanga buaina tlarhnung hi manager Julian Nagelsmann-a'n a la siam ṭha thei lo.

Bayern-in hma hruai nawn nan hun an mamawh tam lo a, minute 60-naah kum 19 mi Jamal Musiala-a'n box chhunga ball a lampui hnuah goal ṭha a khung. Mualneitu tan chakpuina goal ni tura ngaih ni mah se Stuttgart-in injury time-ah siphurh an sut.

Dutch defender Matthijs de Ligt chuan Serhou Guirassy chu box chhungah a tlawh thlu a, VAR-in an ennawn hnuah penalty an pe. Guirassy hian chiang takin a pet goal a, 2-2 in inkhel a tawp.

Bayern hian September 13, Thawhlehni zanah Robert Lewandowski telna Barcelona an mikhual dawn a, Julian Nagelsmann-a'n tlarhnung a rem phui lehzual a ṭul khawp ang.