Rose hoin Leipzig-in Dortmund an sawp

RB Leipzig-in result ṭha an neih loh avangin manager Domenico Tedesco an ban a, Borussia Dortmund duh loh Marco Rose an lalut. Rose-a hoin Inrinni zan khan Dortmund an mikhual a, 3-0 in an sawp.

Red Bull Arena-ah Leipzig tan Willi Orban-a'n minute rukna lekah a khung a, minute 45-naah Dominik Szoboszlai-a'n a khung belh leh bawk. Second half-ah substitute Amadou Haidara-a'n chak nemnghehna goal a khung.

Leipzig-in Rose hnuaiah bul ṭan ṭha mah se season bul an ṭan ṭhat loh avangin point riat chauh an la hmu a, 10-naah an awm. Dortmund-in point hlawh chhuak lo mah se point 12 hmuin pakhatna Bayern Munich nen an point hmuh zat a inang.

Point 12 hmu zingah Hoffenheim an tel a, André Breitenreiter hote hian Mainz 4-1 in an hneh. Nizan khan Freiburg-in Borussia Monchengladbach an mikhual a, point an hmuh hrim hrim chuan hmahruaitu an ni thei ang.