A hunah tak Giroud a inlar leh ta

Player kim lo chungin second half tluan deuhthaw an khelh a ngai a, mahse a hunah tak Olivier Giroud a inlar. France international hian penalty chhuih lutin AC Milan chu Sampdoria mualah 2-1 in hnehna a chanpui.

Inrinni zan Serie A inkhel dangah Inter Milan pawh an chak, hun tawp dawna midfielder Marcelo Brozovic goal hmangin an mikhual Torino chu 1-0 in an hneh hram a, an elpui Milan an thlah fal duh bik lo.

A hunah Milan
AC Milan hian season hmasa khan Serie A nomawi an chawi, kuminah pawh humhim ngei an tum. Mahse, season kal laia khualmuala an fehchhuahna hmasa pahnihah Stefano Pioli nauten Atalanta leh Sassuolo te an inhnehtawkpui.

Sampdoria lakah Junior Messias hmangin minute rukna lekah goal hmahruai an khung a, a vawi khat nan khualmualah an chak dawn niin a lang. Amaherawhchu, minute 47-naah Rafael Leao chu hnawhchhuah a ni, an dinhmun a him ta lo.

Player kim loa khel Milan hian an kim loh aṭanga minute 10 hnuah goal an chhuah ta nge nge, mualneitu lamin Filip Djuricic hmangin an sut a, a nihna takah chuan Milan tan point khat chauh hlawhchhuah pawh thil lawmawm a ni dawn.

Mahse, Sampdoria lamin goal an neih aṭanga minute 10-naah bawk midfielder Gonzalo Villar chuan penalty a chawi a, a pet tura rawn ding chhuak Giroud tan buaina tur a awm lo, point thum hlawhchhuahna goal a khung.

Milan midfielder Sandro Tonali chuan, "Inkhel harsa tak a ni, kan tan chuan point thum hmuh theih hi a lawmawm," a ti. Inkhel tawp lam boruak sangah Sampdoria coach Marco Giampaolo chu referee laka a ṭawngkam mawi lo vangin hnawhchhuah a ngai hial.

Inter an chak
An elpuite an chak a nih chuan Inter Milan tan pawh chak a ngai, season tir lama point hloh hi season tawp lam champion tum inum boruak sangah a uiawm ṭhin, tun ṭuma Torino laka Brozovic goal pawh hi an la ngaihlu khawp ang.

Inter goalkeeper Samir Handanivic-a'n a team a chhan nasa malh malh hle a, mikhual Torino lam goal khung tur ṭha zet zetin a dansak. Hun tawp dawnah Nicolo Barella-a through ball dawngtu Croatian midfielder Brozovic-a'n an lawmna a belhchhah ta a ni.

Serie A match ruk an khelh tawh chinah Inter hian point 12 an hmu a, table-ah palina an ni. Hmahruaitu Napoli leh an hmelna Milan ten point 14 an nei thung a, match khat lekah an dinhmun hi a la inthlak danglam thei.

Nipui bazara an player ṭha tam tak chantu Napoli an la che fuh tlat. Inrinni zan khan Giacomo Raspadori goal hmangin Spezia 1-0 in an hneh a, table hmahruaitu an ni chhunzawm - an league match lehpekah an hnuai chiaha awm Milan nen an inkhel dawn.

Luciano Spalletti enkawl Napoli hian Serie A match an khelh hmain Champions League khel turin Rangers an tlawh dawn, khual khuaah an zin dawn bakah kartawp inkhelh tur ngaihtuah tel a ngaih avangin player siksawi a ngaiin a rinawm.