UEFA Player of the year Ronaldo
Real Madrid forward Cristiano Ronaldo chuan UEFA men's player of the year award a dawng.
August 24, Ningani zan khan Grimaldi Forum, Monaco-ah season liam taa player khel ṭha ber puanna neih a ni a. Barcelona forward Lionel Messi leh Juventus keeper Gianluigi Buffon ten kum 32 mi Ronaldo an tluk pha lo.
Hmeichhe player of the year Netherlands midfielder Lieke Martens chu thlan a ni a, kumin July thlaa football khelh chawlhsan Francesco Totti-a'n hnenah 'president's award' hlan a ni ve bawk.
Ronaldo - hattrick
UEFA-in player of the year award hi kum 2011 aṭangin a sem ṭan a, tun ṭum hi vawi sarih an semna niin Portugal captain Ronaldo hian kum li chhungin vawi thum a dawng.
Chawimawina dawng hmasa bertu Messi-a'n vawi hnih a dawng tawh a, Andres Iniesta leh Franck Ribery ten vawi khat ve ve an dawng tawh bawk.
Ronaldo hian season liam ta khan record a nei ṭha a, hei vang hian vote-ah pawh a chungnung. Real Madrid forward hian point 482 a hmu a, Messi (141) leh Buffon (109) te point hmuh zat belhkhawm pawhin a pha lo.
Kum 32 mi Ronaldo chuan, "Kum tinin hmachhawp ngai ka nei a, chu chu nomawi chawi theih apiang chawi a ni a, World Cup khel tura Portugal hruai thlen a ni bawk. Tuna chawimawina ka dawn hian thawkrim lehzual tura min tih phur ngei ka beisei a, tlawm duh lohna thinlung min pe bawk ang," tiin a sawi a, Real Madrid tana a khel thei chu vanneih a intih thu a sawi.
Ronaldo hi season liam ta Champions League-ah best forward atan thlan a ni. Kum 32 mi Real Madrid forward hian match 13 a inlan a, minute 1200 a inlan chhungin goal 12 a khung a, assists vawi ruk a nei bawk. Portugal captain hi Real Madrid-in UEFA Champions League, Spanish Liga leh FIFA Club World Cup an champion-na kawngah a thlawh hlawk hle.
Ronaldo leh goal
Ronaldo hian a career-ah match 721 khelin goal 530 a khung a, Real Madrid tan match 396-ah goal 407 a khung. Spanish club tan hian Champions League-ah match 88 khelin goal 90 a khung a, Manchester United tan match 52-ah goal 15 a khung bawk avangin a belhkhawmin Europe-a inelna sang bera goal khung tam ber a ni.
Champions League-ah Portugal captain hian vawi ruk top scorer ni tawhin record nei ṭha ber a ni a, season nga chhung chu top scorer a ni tawh bawk. Ronaldo hian ram tan vawi 143 inlanah goal 75 a khung a, UEFA Euro 2016-ah an ram Portugal a champion bawk.
Chawimawina dang
Champions League final-a Juventus hruai thlengtu Gianluigi Buffon chu best goalkeeper atan thlan a ni a, Italian keeper hian match 12 a inlanah match 9 a clean sheet.
Real Madrid-in Champions League nomawi an chawi a, goalkeeper position tih loh chu an hui fai vek. Sergio Ramos chu best defender-ah thlan a ni a, Spanish defender hian match 11-a inlanah goal khat khungin assists vawi thum a nei a. Best midfielder-ah Croatian midfielder Luka Modric chu thlan a ni.
Chawimawina
Player of the Year Cristiano Ronaldo
Women's Player of the Year Lieke Martens
Best Goalkeeper Gianluigi Buffon
Best Defender Sergio Ramos
Best Midfielder Luka Modric
Best Forward Cristiano Ronaldo
UEFA President's Award Francesco Totti