Anfield-ah Arsene-a Arsenal
Arsene Wenger-a'n "Hun hlimawm kan tawng fo a, a chang chuan zahna mittui nen kan chhuahsan a ngaih chang a awm," tiin Liverpool khelmual Anfield-a an hun hman tawh ṭhin dan a sawi. Pathianni zan dar 8:30 hian Liverpool-in Premier League match pawimawh khel turin Gunners an mikhual dawn - Jurgen Klopp-a'n Champions League khelhna hmun aṭanga a pet chhuah Wenger lakah zahngaihna a lantir a rinawm loh.
Season hmasa league khuh hawn nan Liverpool hian Eimrates Stadium-ah 4-3 in hnehna an chang a, Reds hian an khelmualah 3-1 a hnehna chang nawnin North London club hi hnehna hlado an chham khum nawn sak bawk. Season hmasa an intawnna bikah chuan Wenger aiin Klopp a chungnung zawk.
Liverpool leh Arsenal te Anfield-a an inkhelh hnuhnung match liah goal 20 zet a lut a, tun dinhmuna team pahnihte khelh dan phung thlir chuan Pathianni zanah pawh goal a lut hnem leh a nih pawhin a mak lo ang. Liverpool hian club lian paruk lak aṭangin season hmasa khan point 20 an hmu thei a, record nei ṭha ber an ni - tun season atan Gunners hi club lian an hmachhawn hmasak tur an ni.
Mane hlau ru
Sadio Mane-a'n Reds jersey ha chunga a league match hmasa berah Gunners goal-ah a chhuih lut nghal a, a vawi hnihnaah pawh a pet goal leh sak. Senegal international hian a zawnin league match hnih goal a khung leh tawh a, Champions League playoff lamah pawh a goal khung thiam a chhawm nung zel.
Kum 25 mi Mane thlawp tur hian AS Roma aṭangin Mohamed Salah an neih belh tawh bawk a, Chelsea forward hlui hian a thiamna a pholang chho mek. League match bika Arsenal a hmachhawn ṭum lia goal thum khungtu Firmino an la neih cheuh avangin Leicester City leh Stoke laka tlarhnung pawp Gunners defender-te hna a hautak dawn.
Barcelona nena sawi zawm Philippe Coutinho dinhmun chu he thu buatsaih lai hian kan hre hman lo a, Brazil international hi a inkhel a nih chuan tun season-a a match hmasa ber tur a ni ang.
German manager Klopp kaihhruaina hnuaiah Reds hian tun season-a inelna hrang hrangah match li an khelh aṭangin goal 10 an khung tawh a, an tlarhma an hriam tih a chiang. Mahse, duhthusam lohna lai an neih chu tlarhnung phui lo hi a ni, goal sarih an chhuah tawh.
Koscielny inlan dawn
Arsenal manager Wenger chuan, "Laurent Koscielny a inkhel thei tawh dawn a, Alexis pawh rim taka training a neih hnuah inkhel turin a inpeih tawh bawk," a ti. Player langsar pahnih inkhel thei tur hi Gunners fans tan chuan chanchin ṭha tak a tling ang.
France international Koscielny hi season hmasa match hnuhnung bera hnawh chhuah a nih avangin match thum khel thei lo tura hrem a ni a, hremna a hmang zo chiah tawh. Arsenal hian an league match hmasa pahniha Foxes leh Stoke City an hmachhawn ṭumin goal li an chhuah a, an tarhnung a phui lo hle; kum 31 Koscielny rawn kir hian an tlarhnung a ti khauh sawt tura ngaih a ni.
Gunners hian striker thar Alexandre Lacazette an nei a, Lyon striker hlui hian an mamawh zat goal a la khung lo. Foxes lakah goal hmahruai khung mah se Stoke laka a goal khung pawm a nih loh avangin point an hmu lo - Reds tlarhnung su hawng tur chuan a ṭhiante puihna a mamawh ang. Season hmasa inelna hrang hranga goal 30 khung thei Sanchez hi a inlan a nih ngat chuan Lacazette kawng siaksaktu pawimawh a ni thei ang.
Premier League Fixtures
Zanin Inkhel Tur
AFC Bournemouth 5:00 PM Manchester City
Crystal Palace 7:30 PM Swansea City
Huddersfield Town 7:30 PM Southampton
Newcastle United 7:30 PM West Ham United
Watford 7:30 PM Brighton & Hove
Manchester United 10:00 PM Leicester City
August 27, Pathianni
Chelsea 6:00 PM Everton
West Brom 6:00 PM Stoke City
Liverpool 8:30 PM Arsenal
Tottenham Hotspur 8:30 PM Burnley