Mayweather v McGregor A hun a thleng dawn ta
Khawvel hmuh chak fight ropui chu Pathianni zingah a thleng dawn ta - Floyd Mayweather hmaah Conor McGregor a ding dawn. Las Vegas khawpui lam hawiin khawvelin a mit a len ang a, fight hmuhnawm hmuh an inbeisei ang. Zing dar 6:30-ah fight dang hmangin bul ṭan a ni ang a, zing dar 8:30 velah chuan fighter pahnih hi inhmachhawn hman tura ngaih an ni.
McGregor-a'n, "Round hnihnaah ka knockout ang a, a mang ram aṭanga tih harhin a awm ang," tiin Mayweather chungchang a sawi a, hnehna chan ngei a tum - mahse, Irish fighter thil tum hi American boxer hmaa ding boxer 49-in tih an lo tum tawh a, a tlawm zawk nichungin ring an chhuahsan vek.
Rin hlawh lo
UFC-ah McGregor-a'n rorel mah se boxing ring chhung erawh a la rap ngai lo a, hei vang tak hian boxing legend zingah Irish fighter a chak zawk ring an awm lo. Tun hnaiah boxing match-a hliam enkawl hna thawk ṭhin pawl Association of Ringside Physicians chuan thuthar an nei a, McGregor nunna atan an hlauthawng!
ARP president Larry Lovelace chuan, "He fight hi eng vanga awm tur nge a nih pawh kan hrethiam lo. Tu emaw hi chu hliam na tak tuarin a chhuak ang tih kan hlau takzet," a ti a, McGregor an hlauhthawnpui. June thla khan MMA-a vawi 34 fight hmachhawn tawh Tim Hague chuan boxing a luhchilh hnua a vawi li nan fight a hmachhawn a, Adam Braidwood lakah dinhmun hlauhthawnawm khawpa nain hliam a tuar - hei hi ARP chuan a thlen nawn an hlau.
Mahse maw...
Khawvelin ring lo mah se McGregor a inringtawk a, Irish fighter chuan, "First round aṭangin ka tukzal nghal ang a, round hnih emaw round thum dang chu ka duhtawka ka kut thak ka hnawih dawn avangin referee-in inhnek a tihtawp a ngai hial ang," a ti!
Irish fighter chuan sawi chhunzawmin, "A hun lo thleng phawt mai teh se, UFC Lalpa hi Boxing Lalpa ka ni leh dawn a ni," a ti a, a Lalṭhuthleng aṭanga Mayweather paih thla turin a inringtawk.
A hmuhnawm dawn
Manny Pacquiao nen an inhnek ṭumin Mayweather-a'n sawisel a hlawh a, McGregor lakah erawh fight hmuhnawm phochhuah a tum. American boxer chuan, "Mipui hian fight hmuhnawm tak hmuh an phu a, chu chu phochhuah ka tum dawn a ni. Ni e, Pacquiao kha ka kut dinglama na taka ka hnek khan a tha a ṭhum vek a, chutiang chu a thleng leh dawn a ni," a ti.
Mayweather chuan, "Engpawhnise, rei tak erawh kan inhnek dawn lo. McGregor chuan a duh duh lo sawi se la, rei tak a daih dawn lo," a ti a, a fight hnuhnung ber tur a nih thu sawi nghalin, "Ka fate ka tiam tawh a, ka chhungte pawh ka tiam tawh. I taksa tlin tawp thleng i beih a, i hmaa ding apiang i hneh bawk si chuan i chawlh a hun ve tawh tihna a ni," tiin boxing a chawlhsan tak tak tur thu a sawi.
Fighter pahnih khaikhinna
(light-middleweight)
Floyd Mayweather Vs Conor MCGregor
40 Age 29
5'8" Height 5'9"
151 Weight 154
72 inches Reach 74 inches
49-0 (boxing) Won-Lost 21-3 (MMA)
26 K.O. 18
Inhmachhawn tur dang
Gervonta Davis v Francisco Fonseca (IBF junior lightweight)
Nathan Cleverly v Badou Jack (WBA light-heavyweight)
Andrew Tabiti v Steve Cunningham (cruiserweight)
Thomas Dulorme v Yordenis Ugas (welterweight)
Juan Heraldez v Jose Borrego (welterweight)
Kevin Newman v Antonio Hernandez (super-middleweight)
Savannah Marshall v Sydney LeBlanc (super-middleweight)