Manchester + Zlatan = United

Zlatan Ibrahimovic chuan Manchester United tan season khat dang khel chhunzawm turin contract thar a ziak leh ta. Kum 35 mi striker hian season tawp lamah a khupah hliam a tawrh avangin June thla khan United hian an chhuah zalen a, beisei aia a dam chak leh tak avangin contract thar hi an ziahpui a ni.

United manager Jose Mourinho chuan, "Season hmasaa a khelh dan enin kan hnena khelh leh hi a phu a, a lo kir theih hun nghakhlel takin kan thlir dawn a ni. Dam lam a pan mek avang pawhin kan lawmpui a, a tumruhna leh tawnhriat te kan chhawr ṭangkai leh thei tur hi ka hlim hle," a ti a, Swede striker hi December-ah chuan lo kir leh thei tawh turah an ngai.

Kum 2001 hnua season tina nomawi la chawi ziah Ibrahimovic hi LA Galaxy leh Los Angeles FC-in lakluh tumin rim mah se Europe-a inkhelh chhunzawm zel a thlang. Zlatan chuan, "Club leh kei pawhin ka duhdan chu United tana khelh zel hi a ni. Old Trafford-a inlan hlan ka nghakhlel tawh a, mah se hmanhmawh luat vanga khelh thawt thawt erawh ka tum lo. Ka lo kir hunah chuan tun hma zawng aia ṭhaa khelh ka duh dawn a ni," tiin hun a la mamawh thu a sawi.

Ajax, Juventus, Inter Milan, Barcelona, AC Milan leh PSG tana khel tawh striker chuan, "United-ah hian ka hnathawh zawh loh thawk chhunzawm turin ka lo kir a ni," a ti a, Premier League club-ah hmabak la nei niin a inngai. Zlatan hian season hman zawh takah khan United tan match 46 khelin goal 28 a khung sak a ni.

Manchester United hian zanin dar 10:00-ah Leicester City chu Premier League match-ah an mikhual ang.