Neymar-a'n Barca khinglet dawn
Barcelona-in pound maktaduai 200-a Paris St-Germain hnena an hralh forward Neymar an khin tur thu an puan hnu lawkah Brazil captain leh a dan hremite chuan Catalan club-in an khinna hi an khinlet tur thu an sawi.
Neymar hian nikum August khan Barcelona-ah kum nga dang cham chhunzawm turin contract thar a ziak a, club tana a rinawmna avang hian Barca chuan 'bonus' pound maktaduai 7.8 an pe. Contract a ziah aṭanga thla kua a liam hnu lawkah Neymar hian club dang a zawm leh si a, Barca chuan an player hlui hi a 'rinawm lawmman' an lo pek tawh chu pe let tura tiin court-ah an khing a ni.
Khawvela footballer manto ber Neymar leh a dan hremi chuan, "Barcelona-in player an khinna chhanglet turin rei loteah court lamah tihfel ngaite kan ti ang," tiin Catalan club lamin an khinna chungchangah an thiamthu ngawih bo pui mai mai an tum loh thu an sawi a, bonus chungchangah Neymar chuan court hmaa tih tur ṭulte a buaipui mek thu an sawi bawk.
Hei mai hi a la ni lo cheu, Neymar hian FIFA hnenah Barcelona hi a hek bawk a, football khawvela thuneitu sang ber FIFA chuan Neymar-a'n a club hlui a hekna hi an dawn tawh thu an sawi. Neymar buaipuitu N&N Consultoria chuan an player chuan bonus a dawn chungchangah a tih turte a tih vek thu an tarlang.